மோகன்லால் நடிக்கும் பான் இந்தியா திரைப்படம் ‘விருஷபா’வை கன்னட இயக்குநர் நந்தா கிஷோர் எழுதி இயக்கியுள்ளார். இதில் ரோஷன் மேகா, ஸ்ரீகாந்த் மேகா, ராகிணி திவேதி, நேகா சக்ஸேனா, சஹ்ரா எஸ்.கான் உள்ளிட்ட பலர் நடித்துள்ளனர். இந்தப் படத்தை ஏ.வி.எஸ் ஸ்டுடியோ சார்பில் அபிஷேக் வியாஸ், பர்ஸ்ட் ஸ்டெப் மூவிஸ் சார்பில் ஷியாம் சுந்தர், பாலாஜி டெலிபிலிம்ஸ் சார்பில் ஏக்தா கபூர், கனெக்ட் மீடியா சார்பில் வருண் மாத்தூர் ஆகியோர் இணைந்து தயாரித்துள்ளனர்.
தமிழில் ‘லொடுக்கு பாண்டி’, ‘ஒரு மெல்லிய கோடு’, ‘வன்முறை’ போன்ற படங்களில் நடித்திருந்த நேகா சக்ஸேனா இப்படத்திலும் முக்கிய கதாபாத்திரத்தில் நடித்துள்ளார். காதலும் பழிக்கு பழி வாங்கும் உணர்வும் என இரண்டு நேர் எதிர் உணர்ச்சிகளின் மோதலை மையமாகக் கொண்டு உருவாகியிருக்கும் இந்த படம், பிரம்மாண்டமான ஆக்ஷன் என்டர்டெய்னராகவும், அப்பா-மகன் உறவை மையப்படுத்திய கதையாகவும் இருக்கும் என தகவல்கள் தெரிவிக்கின்றன.
இப்படத்துக்கு இசையமைப்பாளராக சாம் சி.எஸ் பணியாற்றியுள்ளார். மோகன்லால் தனது டப்பிங் பணிகளை சமீபத்தில் நிறைவு செய்துள்ளார். இதனிடையில், ‘விருஷபா’ திரைப்படம் வரும் நவம்பர் 6ம் தேதி திரையரங்குகளில் வெளியாகும் என படக்குழு அறிவித்துள்ளது.
