ஜி.வி.பி. பிக்சர்ஸ் சார்பில், ஜி.வி. பெருமாள் எழுதி, தயாரித்து, இயக்கிய படம் சரீரம். இதில் புதுமுகங்கள் தர்ஷன், சார்மி நாயகன்–நாயகியாக நடித்துள்ளனர். மேலும் ஜே. மனோஜ், பாய்ஸ் ராஜன், ஷகீலா, மதுமிதா, புதுப்பேட்டை சுரேஷ், கவுரி, லில்லி, மிலா ஆகியோருடன் ஜி.வி. பெருமாளும் முக்கிய கதாபாத்திரத்தில் நடித்துள்ளார். இசையமைப்பை வி.டி. பாரதிராஜா மேற்கொண்டுள்ளார். படம் வரும் 26ம் தேதி வெளியாகிறது.
படம் குறித்து இயக்குனர் ஜி.வி. பெருமாள் கூறுகையில், “கடவுள் ஒவ்வொருவருக்கும் அளித்திருக்கும் தனிச்சிறப்பு தான் சரீரம். அதன் உண்மையான அருமையை யாரும் புரிந்துகொள்ளவில்லை. ஒருவரின் சரீரத்தை மாற்றிக் கொள்ளும் உரிமை யாருக்கும் இல்லை. இந்த ஆழமான கருத்தை பேசுவதோடு, இளமை துள்ளும் காதலை மையமாகக் கொண்ட படைப்பாகவும் இது இருக்கும்.
ஒரு காதல் ஜோடிக்கு, அவர்களது காதலுக்கு குடும்பம் எதிர்ப்பு தெரிவிக்கிறது. வாழ்வதற்கான வழியின்றி, அவர்கள் தங்கள் காதலுக்காக ஆண் பெண்ணாகவும், பெண் ஆணாகவும் தங்கள் பாலினத்தையே மாற்றிக் கொள்கிறார்கள். அந்தக் காதல் ஜோடியை சமூகம் ஏற்றுக்கொண்டதா இல்லையா? அவர்களின் விதி என்ன ஆனது என்பதே படத்தின் கதை. இதுவரை திரையில் காதலுக்காக பல தியாகங்கள் சொல்லப்பட்டுள்ளன—வார்த்தை, மனசு, உணர்ச்சி என. ஆனால் சரீரத்தையே தியாகம் செய்யும் காதலர்களின் கதையைச் சொல்வது முதல்முறையாக இந்தப் படம் உருவாகியுள்ளது,” என்றார்.
