தமிழ் திரையுலகின் முன்னணி நடிகர்களில் ஒருவராக வலம் வரும் ஜெய், தற்போது ஒர்க்கர் என்ற புதிய திரைப்படத்தில் கதாநாயகனாக நடிக்கிறார். இதில் ஜெய்க்கு ஜோடியாக ரீஷ்மா நனையா நடித்துள்ளார். வினய் கிருஷ்ணா இயக்கும் இப்படத்தில், யோகி பாபு முக்கியமான கதாபாத்திரத்தில் நடிக்கிறார். மேலும், நாகினீடு, பரத் கல்யாண், பிரவீனா, ஸ்ரீஜா ரவி, சசி லயா, வெங்கட் செங்குட்டுவன் ஆகியோரும் நடித்துள்ளனர்.

உண்மை உணர்வுகள், சுவாரஸ்யமான கதை மற்றும் ரசிகர்களை ஈர்க்கும் பல தருணங்களால் ஒர்க்கர் திரைப்படம் சிறப்பாக அமையும் என்று இயக்குனர் வினய் கிருஷ்ணா நம்பிக்கை தெரிவித்துள்ளார். இந்த படத்தை ப்ரிமுக் பிரசன்ட்ஸ் நிறுவனத்தின் சார்பில் ஷோபனா ராணி தயாரிக்கிறார். அஞ்சி ஒளிப்பதிவு செய்யும் இப்படத்திற்கு ஜிப்ரான் இசையமைக்கிறார்.
சென்னையில், ஒர்க்கர் திரைப்படத்தின் பூஜை நிகழ்ச்சி பிரம்மாண்டமாக நடைபெற்றது. தொடர்ந்து, பாண்டிச்சேரியில் படப்பிடிப்பு விறுவிறுப்பாக ஆரம்பமாகியுள்ளது. விரைவில் இப்படம் குறித்த பிற தகவல்களும் வெளியிடப்படும் என அறிவிக்கப்பட்டுள்ளது.