‘பாணா காத்தாடி’, ‘பரதேசி’, ‘சண்டிவீரன்’ போன்ற திரைப்படங்களின் மூலம் ரசிகர்களிடையே தனித்துவமான இடத்தைப் பிடித்தவர் நடிகர் அதர்வா. தற்போது இவர் ‘இதயம் முரளி’ , ‘பராசக்தி’ படங்களில் நடித்து வருகிறார். மேலும் அறிமுக இயக்குநர் ரவீந்திர மாதவா இயக்கத்தில் ‘தணல்’ எனும் படத்தில் நடித்துள்ளார்.
இந்த படத்தில் அஸ்வின், லாவண்யா, பிரதீப் விஜயன், சர்வா, போஸ் வெங்கட் உள்ளிட்ட பலரும் நடித்துள்ளனர். ஆக்ஷன் திரில்லர் வகைச் சேர்ந்த இத்திரைப்படத்தை அன்னை பிலிம்ஸ் புரொடக்ஷன்ஸ் நிறுவனம் தயாரித்துள்ளது. படப்பிடிப்பு பணிகள் இரண்டு ஆண்டுகளுக்கு முன்னரே முடிந்திருந்தது என்பது குறிப்பிடத்தக்கது.
இந்தக் கதையில் அதர்வாவுக்கு ஜோடியாக, தமிழில் ‘பிரம்மன்’, ‘மாயவன்’ போன்ற படங்களில் நடித்த லாவண்யா திரிபாதி நடித்துள்ளார். இசையமைப்பாளர் ஜஸ்டின் பிரபாகரன் இசையமைத்துள்ள இத்திரைப்படம், வரும் ஆகஸ்ட் 29 ஆம் தேதி வெளியாகும் என படக்குழுவினர் அறிவித்துள்ளனர். இந்நிலையில், ‘தணல்’ படத்தின் “ஆசை தீவே” என்ற பாடலை படக்குழு வெளியிட்டுள்ளது.
