மலையாள திரைப்படத் துறையின் பிரபல நடிகரும், தற்போது மத்திய இணை அமைச்சராக உள்ள சுரேஷ் கோபி முக்கியக் கதாபாத்திரத்தில் நடித்துள்ள படம் ‘ஜே.எஸ்.கே (ஜானகி Vs ஸ்டேட் ஆப் கேரளா)’ என்ற தலைப்பில் உருவாகியுள்ளது. முழுமையாக நீதிமன்றம் சார்ந்த பின்னணியில் அமைந்துள்ள இந்த திரைப்படத்தில் கதாநாயகியாக அனுபமா பரமேஸ்வரன் நடித்துள்ளார். இப்படத்தை இயக்குநர் பிரவீன் நாராயணன் இயக்கியுள்ளார். ஜூன் 27ம் தேதி இப்படம் வெளியாகும் என முன்கூட்டியே அதிகாரப்பூர்வமாக அறிவிக்கப்பட்டிருந்தது.
அந்தவகையில், சமீபத்தில் இப்படம் சென்சார் குழுவிற்கு அனுப்பப்பட்டபோது எந்தவிதமான காட்சிகளையும் வெட்டாமல் ‘யு/ஏ 13+’ சான்றிதழ் பெற்றது. ஆனால், எதிர்பாராத முறையில் சென்சார் குழுவினர் படம் வெளியாவதற்கான தலைப்பில் மாற்றம் செய்ய வேண்டுமென படக்குழுவினரிடம் அறிவுறுத்தியுள்ளனர். குறிப்பாக, தலைப்பில் உள்ள ‘ஜானகி’ என்ற பெயரை மாற்றுமாறு அவர்கள் வற்புறுத்தியதாக கூறப்படுகிறது.
இது குறித்து படத்தின் இயக்குநர் பிரவீன் நாராயணன் உறுதிப்படுத்தியதிலிருந்து, ஜூன் 27ம் தேதி படம் வெளியாகாது என்றும், படம் வெளிவரும் தேதி தாமதமாகும் என்றும் தெரிய வந்துள்ளது. தற்போது படம் மீண்டும் மறு தணிக்கைக்கு அனுப்பப்பட்டுள்ளது. தலைப்பை மாற்றுவார்களா அல்லது அதையே வைத்துக்கொள்வார்களா என்பது விரைவில் தெரியவரும். ஒரு மத்திய இணை அமைச்சராக இருப்பவரான சுரேஷ் கோபி நடித்த படம் கூட சென்சார் சிக்கலை சந்தித்திருப்பது அனைவரையும் ஆச்சரியப்பட வைக்கும் விஷயமாக இருக்கிறது.
