மலையாள திரைப்படத் துறையில் சீனியர் இயக்குநராக திகழும் சத்யன் அந்திக்காடு இன்று வரை இயக்குநராக பிஸியாக பணியாற்றி வருகிறார். தற்போது மோகன்லாலுடன் சேர்ந்து ‘ஹிருதயபூர்வம்’ எனும் புதிய திரைப்படத்தை இயக்கி வருகிறார். இவருடைய மகன்கள் அனுப் சத்யன் மற்றும் அகில் சத்யன் ஆகிய இருவரும் தங்களது தந்தையின் பாதையில் தொடர்ந்து இயக்குநர்களாக மாற்றம் அடைந்து வெவ்வேறு படங்களை இயக்கி வருகிறார்கள். அந்த வரிசையில் அனுப் சத்யன், 2020-ஆம் ஆண்டு துல்கர் சல்மான் மற்றும் சுரேஷ் கோபி நடித்த ‘வரனே ஆவஷ்யமுண்டு’ என்ற திரைப்படத்தை இயக்கி வெளியிட்டார். அந்த படம் வெற்றி பெற்றாலும், அந்த நேரத்தில் இருந்து கடந்த ஐந்து ஆண்டுகளாக அவரது இரண்டாவது படம் தொடங்காமலேயே உள்ளது.
அதேபோல், சத்யன் அந்திக்காட்டின் இரண்டாவது மகனான அகில் சத்யன், 2023-ஆம் ஆண்டில் பஹத் பாசில் நடித்த ‘பாச்சுவும் அற்புத விளக்கும்’ திரைப்படத்தின் மூலம் இயக்குநராக அறிமுகமானார். இந்த படமும் வெற்றிபெற்ற நிலையில், தற்போது அவர் நிவின் பாலியை நாயகனாக வைத்து தனது இரண்டாவது படத்தை இயக்கிக் கொண்டிருக்கிறார். இதற்கான படப்பிடிப்பு தற்போது ஆரம்பிக்கப்பட்டுள்ளது. இந்த படம் பேண்டஸி காமெடி மற்றும் டிராமா கலந்ததாக உருவாகும் என அறிவிக்கப்பட்டுள்ளது. மேலும், தமிழில் பிரபல இசையமைப்பாளராக உள்ள ஜஸ்டின் பிரபாகரன் இந்தப் படத்திற்கு இசையமைக்கிறார்.
இவை அனைத்துடன் சேர்த்து, கடந்த இரு வருடங்களுக்கு முன்பு அகில் சத்யன் இயக்கிய ‘பாச்சுவும் அற்புத விளக்கும்’ திரைப்படம் ஏப்ரல் 28ம் தேதி வெளியானது. அதே தேதியில் இந்த ஆண்டில் அவர் தனது இரண்டாவது படத்தின் படப்பிடிப்பை துவங்கியுள்ளார் என்பது ஒரு சுவாரஸ்ய தகவலாகும். மேலும், அவருடைய முதல் படத்துக்கான கதாநாயகனாக முதலில் நிவின் பாலி தேர்வு செய்யப்பட்டிருந்தாலும், அவரது தேதிகள் சரிவராததால் அந்த வேடத்தில் பஹத் பாசில் நடிக்க நேர்ந்தது என்பது குறிப்பிடத்தக்கது.
