மராத்திய பேரரசர் சத்ரபதி சிவாஜி மற்றும் சாயிபாய் தம்பதியின் மூத்த மகனான சத்ரபதி சம்பாஜி மகாராஜாவின் வாழ்க்கை வரலாற்றை மையமாகக் கொண்டு உருவாக்கப்பட்ட திரைப்படம் ‘சாவா’. லக்ஸ்மன் உடேகர் இயக்கிய இந்தப் படத்திற்கு ஏ.ஆர்.ரகுமான் இசையமைத்துள்ளார். இதில் பிரபல பாலிவுட் நடிகர் விக்கி கவுசல், சத்ரபதி சம்பாஜி மகாராஜாக நடித்துள்ளார். நடிகை ராஷ்மிகா மந்தனா, சம்பாஜியின் மனைவியான மகாராணி ஏசுபாய் வேடத்தில் நடித்துள்ளார்.
மேலும், நடிகர் அக்சய் கண்ணா ஒரு முக்கிய கதாபாத்திரத்தில் நடித்துள்ளார். ரூ.130 கோடி செலவில் தயாரிக்கப்பட்ட இந்தப் படம், கடந்த பிப்ரவரி 14 அன்று திரையரங்குகளில் வெளியாகி, மக்களிடையே சிறப்பான வரவேற்பைப் பெற்று வருகிறது. இதுவரை இப்படம் ரூ.800 கோடிக்கும் அதிகமாக வசூல் செய்துள்ளதாக தெரிகிறது.
இந்நிலையில், இன்று (மார்ச் 27) நாடாளுமன்றத்தில் ‘சாவா’ படம் சிறப்புக் காட்சியாக திரையிடப்படவுள்ளது. இதில் பிரதமர் நரேந்திர மோடி, உள்துறை அமைச்சர் அமித் ஷா மற்றும் பிற முக்கிய தலைவர்கள் பங்கேற்பார்கள் என எதிர்பார்க்கப்படுகிறது.
