மலையாள சினிமாவின் மிக பிரபலமான நடிகர் மோகன்லால். சமீபத்தில் அவரின் நடிப்பில் வெளிவந்த ‘நெரு’ திரைப்படம் மிகுந்த வரவேற்பைப் பெற்று, நல்ல வசூலையும் சேர்த்தது. இதனைத் தொடர்ந்து வெளிவந்த ‘மலைக்கோட்டை வாலிபன்’ திரைப்படம் எதிர்பார்த்த அளவிற்கு வரவேற்பைப் பெறவில்லை.
இதை அடுத்து, மோகன்லால் தனது 360-வது படத்தில் நடிக்க உள்ளார். இந்தப் படத்தை இயக்குநர் தருண் மூர்த்தி இயக்குகிறார். ‘ஆப்ரேஷன் ஜாவா’ மற்றும் ‘சவுதி வெள்ளக்கா’ போன்ற படங்களை இயக்கியதன் மூலம் தருண் மூர்த்தி சிறப்பு கவனத்தைப் பெற்றவர். தற்போது இப்படத்திற்கு தற்காலிகமாக ‘எல்360’ என்று பெயரிடப்பட்டுள்ளது. ரஞ்சித் இப்படத்தை தயாரிக்க, இசையமைப்பாளராக ஜேக்ஸ் பிஜாய் பணியாற்றுகிறார்.
இந்த படத்தில் மோகன்லாலுடன் முக்கிய கதாபாத்திரத்தில் நடிகை ஷோபனா நடித்துள்ளார். 1985-ம் ஆண்டில் மோகன்லால் மற்றும் ஷோபனா முதன்முதலாக இணைந்து ‘அவிடத்தி போலே இவிடேயும்’ படத்தில் நடித்தார்கள். அதன் பிறகு 2004-ல் மாம்பழக்காலம் படத்தில் கடைசியாக இணைந்து நடித்தனர்.இப்போது அவர்கள் மீண்டும் 20 ஆண்டுகளுக்குப் பிறகு இணைந்து நடிக்கின்றனர். சமீபத்தில் ‘எல் 360’ படக்குழு படப்பிடிப்பு வீடியோவை வெளியிட்ட நிலையில், தற்போது படப்பிடிப்பு முடிந்துவிட்டதாக இயக்குநர் புகைப்படம் வெளியிட்டு அறிவித்துள்ளார்.
