இயக்குனர் ஷங்கரின் இயக்கத்தில் கமல்ஹாசன் நடிக்கும் இந்தியன் 2 மற்றும் இந்தியன் 3 படங்கள் இந்த ஆண்டிலேயே வெளியாகும் என்று அறிவிக்கப்பட்டுள்ளது. இந்தியன் 2 படம் ஜூலை மாதத்தில் வெளிவரவுள்ளது. அதற்குப் பின்னர் கல்கி 2898 ஏடி படம் ஆகஸ்ட் மாதத்தில் திரையரங்குகளில் ரிலீஸாகவுள்ளது.இதற்கிடையில், கமல்ஹாசன் மற்றும் மணிரத்னம் 30 ஆண்டுகள் கழித்து இணைந்துள்ள தக் லைஃப் படத்தின் படப்பிடிப்பு விறுவிறுப்பாக நடைபெற்று வருகிறது.
இந்தப் படத்தில் கமல்ஹாசனுடன் திரிஷா, சிம்பு, கௌதம் கார்த்திக் உள்ளிட்ட பலர் நடித்துள்ளனர். சென்னை மற்றும் ஹைதராபாத் போன்ற இடங்களில் படத்தின் படப்பிடிப்பு நிறைவடைந்த நிலையில், தற்போது ஜெய்சல்மார் மற்றும் டெல்லியில் தொடர்ந்த படப்பிடிப்புகளை மணிரத்னம் வெற்றிகரமாக முடித்துள்ளார்.
இந்தப் படத்தின் அடுத்த கட்ட படப்பிடிப்பு விரைவில் சென்னையில் ஆரம்பிக்கப்படும் என தகவல் வெளியாகியுள்ளது. அதன் பின்னர், பாங்காக் மற்றும் செர்பியாவில் படத்தின் அடுத்த கட்ட ஷூட்டிங் நடைபெறவுள்ளது.
இந்தப் படத்தின் படப்பிடிப்பு வேகமாக நடைபெற்று, இந்த ஆண்டின் இறுதியில் படத்தை வெளியிட திட்டமிடப்பட்டுள்ளது. மேலும், இந்த ஆண்டில் கமல்ஹாசனின் பல படங்கள் ரிலீசாக இருப்பது ரசிகர்களிடையே பெரும் உற்சாகத்தை ஏற்படுத்தியுள்ளது.
