‘அமரன்’ படத்தின் வெற்றியைத் தொடர்ந்து இயக்குநர் ராஜ்குமார் பெரியசாமி இயக்கியுள்ள புதிய படம் ‘ஓம் சாப்டர் 1’. தனுஷ், மம்முட்டி இணைந்து நடித்துள்ள இப்படத்தில் சாய் பல்லவி கதாநாயகியாக நடித்துள்ளார். இதில் அவர் ஏஎஸ்பி நித்யா ரெட்டி என்ற காவல் அதிகாரி கதாபாத்திரத்தில் தோன்றுகிறார்.இந்தக் கதாபாத்திரத்தை உருவாக்குவதற்கு கேரளாவைச் சேர்ந்த ஐபிஎஸ் அதிகாரி மெரின் ஜோசப் உத்வேகமாக இருந்ததாக இயக்குநர் ராஜ்குமார் பெரியசாமி தெரிவித்துள்ளார்.
இதுகுறித்து அவர் கூறுகையில், “சாய் பல்லவியின் கதாபாத்திரம் மெரின் ஜோசப்பின் வாழ்க்கையை நேரடியாக அடிப்படையாகக் கொண்டு உருவாக்கப்படவில்லை. இருப்பினும், அந்தக் கதாபாத்திரத்தின் தோற்றத்திற்கு மெரின் ஜோசப் முன்மாதிரியாக இருந்தார். அவரைப் போலவே சாய் பல்லவியும் படத்தில் பாப் ஹேர் கட் ஸ்டைலில் தோன்றுகிறார்” என்றார்.
மேலும், தனது கதாபாத்திரத்திற்குத் தயாராகும் வகையில் சாய் பல்லவி சில நாட்கள் மெரின் ஜோசப்புடன் நேரம் செலவிட்டு, அவரிடமிருந்து பல விஷயங்களைக் கற்றுக்கொண்டதாகவும் இயக்குநர் தெரிவித்துள்ளார்.
