தமிழக முதல்வர் விஜய்யை சந்தித்து வாழ்த்து தெரிவித்த கமல்ஹாசன்!

தமிழக முதல்வர் விஜய்யை பல்வேறு தரப்பினரும் சந்தித்து, வாழ்த்துகளை கூறி வருகின்றனர். அந்த வகையில் நடிகரும், மநீம எம்.பி கமல்ஹாசன் இன்று சந்தித்து பேசினார்.

இதுகுறித்து எக்ஸ் தளத்தில் கமல்ஹாசன் வெளியிட்ட பதிவில், ‛தமிழ்நாடு முதலமைச்சர், தம்பி விஜய்யை இன்று(மே 16) நேரில் சந்தித்து வாழ்த்துகளைத் தெரிவித்தேன். தமிழ்நாட்டை மேம்படுத்தும் பல கனவுகளை உற்சாகத்துடன் பகிர்ந்து கொண்டார். சந்திப்பின்போது அவர் காட்டிய பண்பும் அன்பும் நெகிழ்ச்சியளித்தது. பல்வேறு இடையூறுகளைச் சந்தித்து வரும் தமிழ்த் திரைப்படத் துறைக்கு தமிழ்நாடு அரசின் ஆதரவும் அரவணைப்பும் வேண்டும் என்பதை வலியுறுத்தி 6 முக்கியமான கோரிக்கைகளை அவரிடம் கொடுத்திருக்கிறேன். நன்மை மலரட்டும்” என குறிப்பிட்டுள்ளார்.

திரைத்துறை சார்பில் முதல்வர் விஜய்யிடம் கமல்ஹாசன் வைத்துள்ள 6 கோரிக்கைகள்:

★தமிழக அரசு சார்பில் ஓடிடி தளம் அமைத்தல்

★உள்ளாட்சி கேளிக்கை வரியான 4 சதவீதத்தை முழுமையாக ரத்து செய்தல்

★பைரசிக்கு எதிராக வலுவான குழு அமைத்தல்

★ஒரு நாளைக்கு தினமும் தியேட்டரில் 5 காட்சிகள் படங்கள் திரையிட அனுமதி வழங்கல்

★எல்லா படங்களுக்கும் தியேட்டரில் வெளியான 8 வாரங்களுக்கு பிறகே ஓடிடியில் வெளியிட அனுமதி அளித்தல்

★தமிழகத்தில் 50 சதவீத படப்பிடிப்பு நடத்தப்பட்டால் 10 சதவீதம் வரை தயாரிப்புக்கான ஊக்கத்தொகை வழங்கும் திட்டம்.