தெலுங்கு சினிமாவின் முன்னணி நடிகர்களில் ஒருவராக திகழ்ந்து வரும் ராம் சரண் நடித்த கடைசி திரைப்படமான ‘கேம் சேஞ்சர்’ ரசிகர்களிடையே கலவையான விமர்சனங்களை பெற்றது. பிரபல இயக்குநர் ஷங்கர் இயக்கிய இந்த திரைப்படம் மிகப்பெரிய எதிர்பார்ப்புகளுக்கு மத்தியில் வெளியானாலும், எதிர்பார்த்த அளவிலான வரவேற்பை பெறவில்லை என கூறப்பட்டது. இதனை தொடர்ந்து, அடுத்த திரைப்படத்தின் மூலம் பெரிய வெற்றியை பெற வேண்டும் என்ற நோக்கில், இயக்குநர் புச்சி பாபு சனா இயக்கத்தில் உருவாகியுள்ள ‘பெத்தி’ திரைப்படத்தில் ராம் சரண் நடித்துள்ளார்.
இந்த திரைப்படத்தில் கதாநாயகியாக பாலிவுட் நடிகை ஜான்வி கபூர் நடித்துள்ளார். மேலும், கன்னட சூப்பர் ஸ்டார் சிவராஜ்குமார், ‘மிர்சாபூர்’ தொடரின் மூலம் பிரபலமான திவ்யேந்து மற்றும் நடிகர் ஜகபதி பாபு உள்ளிட்ட பலரும் முக்கிய கதாபாத்திரங்களில் நடித்துள்ளனர். அதிக பொருட்செலவில் பிரமாண்டமாக உருவாகியுள்ள இந்த திரைப்படத்திற்கு இசையமைப்பாளர் ஏ.ஆர்.ரகுமான் இசையமைத்துள்ளார். ரித்தி சினிமாஸ் மற்றும் மைத்ரி மூவி மேக்கர்ஸ் நிறுவனங்கள் இணைந்து தயாரித்துள்ள இந்த திரைப்படத்தில் இடம்பெற்றுள்ள ஒரு சிறப்பு பாடலுக்காக நடிகை ஸ்ருதிஹாசன், ராம் சரணுடன் இணைந்து நடனமாடியுள்ளார்.
உள்ளூர் விளையாட்டு பின்னணியை மையமாக கொண்டு உருவாகி வரும் இந்த திரைப்படத்திற்காக, நடிகர் ராம் சரண் தனது உடலை கட்டுக்கோப்பாக மாற்றி தீவிர உடற்பயிற்சியில் ஈடுபட்டிருந்தார். அதுதொடர்பான புகைப்படங்களை அவர் சமூக வலைதளங்களில் பகிர்ந்தபோது, ரசிகர்கள் அவரை “இந்தியாவின் ஹல்க்” என்று பாராட்டினர். ஏ.ஆர்.ரகுமான் இசையமைப்பில் வெளியான இந்த திரைப்படத்தின் முதல் பாடலான ‘சிக்கிரி’ ரசிகர்களிடையே மிகப்பெரிய வரவேற்பை பெற்றது. இந்த நிலையில், ராம் சரண் மற்றும் ஜான்வி கபூர் நடித்துள்ள ‘பெத்தி’ திரைப்படத்தின் டிரெய்லர் வருகிற 18-ஆம் தேதி வெளியாகும் என படக்குழு அதிகாரப்பூர்வமாக அறிவித்துள்ளது. மேலும், இந்த திரைப்படம் ஜூன் 4-ஆம் தேதி திரையரங்குகளில் வெளியாக உள்ளது.
