‘நாகபந்தம்’ திரைப்படத்தில் பார்வதி என்ற கதாபாத்திரத்தில் நடிகை நபா நடேஷ் நடித்துவருகிறார். இந்தப் படத்தை இயக்குநர் அபிஷேக் நாமா இயக்கி வருகிறார். நடிகர் விராட் கர்ணா இந்த படத்தில் நாயகனாக நடித்துள்ளார். மேலும் மற்றொரு நாயகியாக நடிகை ஐஸ்வர்யா மேனன் நடித்துள்ளார். இவர்களுடன் ஜகபதி பாபு, ஜெயப்பிரகாஷ், முரளி ஷர்மா, அவினாஷ் உள்ளிட்ட பல முன்னணி நடிகர்கள் முக்கிய கதாபாத்திரங்களில் நடித்துள்ளனர்.
தற்போது, நபா நடேஷ் நடித்துள்ள பார்வதி கதாபாத்திரத்தின் தோற்றம் வெளியிடப்பட்டுள்ளது. மகர சங்கராந்தியை முன்னிட்டு வெளியிடப்பட்ட இந்த போஸ்டரில், பாரம்பரிய உடையில் நபா நடேஷ் மிகுந்த அழகும் ஆன்மிக ஒளியும் நிறைந்த தோற்றத்தில் காட்சியளிக்கிறார். அழகிய சேலை, நுட்பமான ஆபரணங்கள் மற்றும் அமைதியான முகபாவனை ஆகியவை அவரது கதாபாத்திரத்தின் பக்தி, தூய்மை மற்றும் புராண அம்சங்களை வெளிப்படுத்தும் வகையில் வடிவமைக்கப்பட்டுள்ளன.
இந்தியாவின் பழமையான விஷ்ணு கோவில்களை பின்னணியாகக் கொண்டு உருவாகும் ‘நாகபந்தம்’ திரைப்படம், புனித ரகசியங்களை மையமாக வைத்து புராணம், சஸ்பென்ஸ் மற்றும் தெய்வீக அம்சங்கள் கலந்த ஒரு கதையாக உருவாகியுள்ளது. இந்த படம் கோடை விடுமுறை காலத்தில் தெலுங்கு, இந்தி, தமிழ், கன்னடம் மற்றும் மலையாளம் ஆகிய பல மொழிகளில் திரையரங்குகளில் வெளியாகும் என இயக்குநர் அபிஷேக் நாமா தெரிவித்துள்ளார்.
