இந்தியன்-2 படத்தைத் தொடர்ந்து, தற்போது ராம்சரண் நடிப்பில் ‘கேம் சேஞ்சர்’ என்ற படத்தை இயக்கி வருகிறார் ஷங்கர். இதற்கு பிறகு, சு. வெங்கடேசன் எழுதிய வேள்பாரி என்ற நாவலை அடிப்படையாகக் கொண்டு தனது அடுத்த படத்தை இயக்கத் திட்டமிட்டுள்ளார். அதற்கான உரிமையை அவர் வாங்கி வைத்திருக்கிறார். ஆனால், இவ்வேளையில், அந்த நாவலின் சில காட்சிகள் அனுமதி இல்லாமல் சில படங்களில் பயன்படுத்தப்பட்டுள்ளதை கண்டு அவர் அதிர்ச்சி அடைந்துள்ளார்.
இதற்குப் பின்னணியாக, தனது சமூக ஊடக பக்கத்தில் அவர் எச்சரிக்கை செய்தி ஒன்றை வெளியிட்டுள்ளார். அதில், “நான் சு. வெங்கடேசன் அவர்களின் புகழ்பெற்ற தமிழ் நாவல் ‘நவயுக நாயகன் வேள் பாரி’யின் பதிப்புரிமையை பெற்றுள்ளேன். ஆனால், அனுமதியின்றி இந்த நாவலின் முக்கியமான காட்சிகள் சில படங்களில் பயன்படுத்தப்பட்டுள்ளதை கண்டது வருத்தமாக உள்ளது. சமீபத்தில் வெளிவந்த ஒரு படத்தின் டிரைலரில் வேள்பாரி நாவலின் முக்கியமான காட்சிகள் திருடப்பட்டு பயன்படுத்தப்பட்டிருப்பதை கண்டு அதிர்ச்சி அடைந்தேன்.
தயவுசெய்து இந்த நாவலின் காட்சிகளை திரைப்படங்கள், வெப் சீரிஸ் போன்ற எந்த ஒரு ஊடகத்திலும் அனுமதியின்றி பயன்படுத்த வேண்டாம். படைப்பாளிகளின் உரிமையை மதியுங்கள். அனுமதி இல்லாமல் காட்சிகளை தழுவி எடுக்க வேண்டாம். எப்படியாவது யாராவது இதை செய்ய முயன்றால், சட்டரீதியாக நடவடிக்கை எடுக்க வேண்டியிருக்கும்,” என்று ஷங்கர் தனது பதிவில் தெரிவித்துள்ளார்.
