2018ஆம் ஆண்டு வெளியான ‘பரியேறும் பெருமாள்’ திரைப்படத்தின் மூலம் தமிழ் சினிமாவில் இயக்குநராக அறிமுகமானவர் மாரி செல்வராஜ். இப்படம் விமர்சகர்களாலும், ரசிகர்களாலும் பெரும் வரவேற்பைப் பெற்றது. அதன் பின்னர், தனுஷ் நடித்த ‘கர்ணன்’, உதயநிதி ஸ்டாலின் நடித்த ‘மாமன்னன்’, மற்றும் ‘வாழை’ ஆகிய படங்களை இயக்கியுள்ளார்.
தற்போது, ‘ஆதித்யா வர்மா’ படத்தின் மூலம் தமிழ்த்திரையில் அறிமுகமான துருவ் விக்ரம் கதாநாயகனாக நடிக்கும் ஒரு புதிய படத்தை மாரி செல்வராஜ் இயக்கி வருகிறார். இந்தப் படத்திற்கு ‘பைசன் காளமாடன்’ என பெயரிடப்பட்டுள்ளது. இப்படத்தில் அனுபமா பரமேஸ்வரன், ரெஜிஷா விஜயன், பசுபதி, கலையரசன் உள்ளிட்ட பலரும் முக்கிய கதாபாத்திரங்களில் நடிக்கின்றனர்.
இந்தப் படத்தை பா.ரஞ்சித்தின் ‘நீலம் ஸ்டுடியோஸ்’ மற்றும் ‘அப்ளாஸ் என்டர்டெயின்மெண்ட்’ நிறுவனங்கள் இணைந்து தயாரிக்கின்றன. இப்படம் ஒரு கபடி வீரரின் வாழ்க்கை வரலாற்றை மையமாகக் கொண்டு உருவாகியுள்ளது.படத்தின் படப்பிடிப்பு வேகமாக நடைபெற்று வந்த நிலையில், தற்போது படப்பிடிப்பு முடிந்துவிட்டதாக தகவல் வெளியாகியுள்ளது. மேலும், இப்படம் இந்த ஆண்டு கோடை விடுமுறையை முன்னிட்டு வெளியிடப்படவுள்ளது என கூறப்படுகிறது.
