நடிகர் விஜய்யின் “தி கோட்” படம் ரிலீசுக்காக முழு தயாராகி வருகிறது. படத்தின் ரிலீசுக்கு இன்னும் சில தினங்களே உள்ள நிலையில், படக்குழுவினர் தொடர்ந்து பிரமோஷன்களில் தீவிரமாக ஈடுபட்டு வருகின்றனர். விஜய் படங்களுக்கு பிரமோஷன்கள் தேவையில்லை என்ற போதிலும், படத்திற்கு தேவையான தகுந்த பிரமோஷன்களை சிறப்பாக முன்னெடுத்து வருகிறார் இயக்குநர் வெங்கட் பிரபு. படத்தின் மூன்று பாடல்கள் அடுத்தடுத்து வெளியான நிலையில், நான்காவது சிங்கிளும் இன்றைய தினம் வெளியாகவுள்ளதாக படக்குழு சார்பில் அறிவிக்கப்பட்டுள்ளது.
“தி கோட்” படத்தின் நான்காவது சிங்கிள் குறித்த அறிவிப்பை படத்தின் கிரியேட்டிவ் தயாரிப்பாளர் அர்ச்சனா கல்பாத்தி தொடர்ந்து வெளியிட்டு உற்சாகம் காட்டி வருகிறார். “இந்த படத்தின் பாடல்களில் தனக்கு மிகவும் பிடித்தமான பாடல் நாளை வெளியாக உள்ள ‘மட்ட’ பாடல் தான்” என்று அவர் தெரிவித்துள்ளார். “தி கோட்” படத்தின் நான்காவது பாடலின் தலைப்பு ‘மட்ட’ என அவர் குறிப்பிட்டதையடுத்து, ரசிகர்கள் இதை பற்றிய கேள்விகளில் மிதந்துள்ளனர்.
இதற்கு பதிலளிக்கும் வகையில் பாடலாசிரியர் விவேக் இந்த பாடலின் சில வரிகளை தனது எக்ஸ் தள பக்கத்தில் பகிர்ந்து, ரசிகர்களுக்கு விளக்கமளித்துள்ளார். “மச்சி கெடா மஞ்ச சட்ட, மம்டி வரான் பள்ளம் வெட்ட, மட்ட மட்ட ராஜ மட்ட, எங்க வந்து யாருகிட்ட” போன்ற வரிகளாக அமைந்துள்ளன.
