விஜய் ஆண்டனி நடித்த கொலை திரைப்படத்தின் மூலம் தமிழ்த் திரையுலகில் அறிமுகமானவர் நடிகை மீனாட்சி சவுத்ரி. இதற்குப் பின்னர் எதிர்பாராத பரிசாக விஜய்யுடன் கோட் படத்தில் ஜோடியாக நடிக்கும் வாய்ப்பை பெற்றார். அந்தப் படம் மூலம் தமிழ் திரையுலக ரசிகர்களிடையே பரவலாக அறிமுகமான மீனாட்சி, தொடர்ந்து துல்கர் சல்மானுடன் ஜோடியாக நடித்த லக்கி பாஸ்கர் திரைப்படம் சமீபத்தில் வெளியாகி பெரும் வெற்றியைப் பெற்றுள்ளது. இந்த வெற்றியின் பின்னணியில், பல முக்கிய நடிகர்கள் மீனாட்சியை நோக்கி கவனம் செலுத்த ஆரம்பித்துள்ளனர். இதனால் தற்போது பிஸியாக இருக்கும் முன்னணி நடிகையாக மாறியுள்ளார் மீனாட்சி சவுத்ரி.
இந்த சூழலில், தெலுங்கு இளம் நடிகரும், நாக சைதன்யாவின் உறவினருமான சுஷாந்த் அனுமோலுவுடன் மீனாட்சி சவுத்ரி காதலில் இருக்கிறார் என்ற தகவல் சமூக ஊடகங்களில் பரபரப்பாக பரவியுள்ளது. மேலும், இருவரும் விரைவில் திருமணம் செய்துகொள்ளப் போகிறார்கள் என்றும் தகவல்கள் வெளியாகியுள்ளன. இதற்கு காரணமாக, அவர்கள் 2021-ஆம் ஆண்டு வெளியான இச்சாட்ட வாகனமுலு நிலபரடு என்ற தெலுங்கு படத்தில் இணைந்து நடித்திருந்தது குறிப்பிடப்படுகிறது.
இந்த நிலைமையில், நாளை (நவம்பர் 22) தெலுங்கில் தான் ஹீரோயினாக நடித்துள்ள மெக்கானிக் ராக்கி படத்தின் புரமோஷன் நிகழ்ச்சியில் நேற்று கலந்து கொண்டார் மீனாட்சி சவுத்ரி. அப்போது, செய்தியாளர்களிடம் பேசிய அவர், இந்தக் காதல் வதந்திகளுக்கு விளக்கம் அளித்தார். பேச்சின் போது, “இவ்விதமான செய்திகள் எப்படித்தான் பரவுகின்றன என்று புரியவில்லை. ஒருமுறை நான் சலார் படத்தில் நடிக்கிறேன் என்று கூறினார்கள். மற்றொரு முறை விஸ்வம்பரா படத்தில் நடிக்கிறேன் என்று பேசினார்கள். அதே போல, இது போன்ற தகவல்களும் வெறும் வதந்திகள் தான். நான் இப்போதைக்கு திருமணம் செய்யப் போவதில்லை. நான் தற்போது சிங்கிளாகவே இருக்கிறேன். ஆனால் யாருடனும் மிங்கிளாக இருக்க தயாராகவும் இல்லை,” எனக் கூறி, இந்த வதந்திகளுக்கு முற்றுப்புள்ளி வைத்தார்.
