வெங்கட் பிரபு இயக்கத்தில் விஜய் நடித்து வரும் ‘தி கிரேடஸ்ட் ஆஃப் ஆல் டைம்’ படத்தின் பிந்தைய பணிகள் மும்முரமாக நடந்து வருகின்றன. இதைத் தொடர்ந்து, விஜய்யின் 69-வது படமான ‘தளபதி 69’ பற்றிய அறிவிப்பு இன்னும் வெளிவரவில்லை. ‘தி கோட்’ படத்தின் பணிகளை முடித்துவிட்டு, ஒரு சிறிய ரிலாக்ஸ் டிரிப்பாக வெளிநாடு பறந்தார் விஜய்.
அவரது பிறந்தநாளான ஜூன் 22 தேதி படத்தின் டீசர் அல்லது இரண்டாவது பாடல் வெளியிடப்படலாம் என்றும் பல ஆச்சரியங்கள் காத்திருக்கின்றன என்றும் தகவல்கள் கூறுகின்றன.விஜய்யின் பிறந்தநாள் கொண்டாட்டங்களைத் தொடர்ந்து, தமிழக வெற்றிக் கழகம் சார்பில் 12-ம் வகுப்பு மற்றும் 10-ம் வகுப்பு மாணவர்களை சந்தித்து பரிசுகள் வழங்குகிறார். அதன்படி, மாணவர்களை இம்மாதம் 28-ம் தேதி மற்றும் ஜூலை 3-ம் தேதி என இரு கட்டங்களாக சந்திக்கிறார். அதற்கான வேலைகளும் மும்முரமாக நடந்து வருகின்றன. பொதுவாகவே, விஜய்யின் ஒவ்வொரு வருடத்திலும் ஒரு படம் நிச்சயம் வெளிவரும். அதேபோல, இந்த ஆண்டு ‘தி கோட்’ வெளிவருகிறது.
இதன் வெளியீட்டிற்கு முன்பாக அடுத்த படமான ‘தளபதி 69’-யின் படப்பூஜையோ அல்லது அறிவிப்போ வெளிவரலாம் என்றும் எதிர்பார்க்கப்படுகிறது.இந்நிலையில் தளபதி 69 படம் விஜய்யின் அரசியல் பிரவேசத்திற்காக கைவிடப்படுவதாக தகவல்கள் பரவின.ஆனால் ‘லியோ’ படத்தின் மூலம் இணை தயாரிப்பாளரான ஜெகதீஷ், ‘தளபதி 69’-யின் தயாரிப்பாளராகவும் இருப்பார் என்றும் ஹெச் வினோத் தான் இப்படத்தை இயக்கவுள்ளார் என கூறப்படுகிறது. தற்போதைய தகவல்படி, படம் நிறுத்தப்பட வாய்ப்பில்லை என்பதுதான் விஜய் தரப்பு தகவல். இதற்கிடையில், தமிழக வெற்றிக் கழகத்தின் பிரமாண்ட மாநாடு நடைபெறவுள்ளது. சட்டமன்றத் தேர்தலுக்காக ரெடியாக வேண்டியிருப்பதால், மாநாடு குறித்த வேலைகளும் தீவிரமாக நடந்து வருகின்றன என்று கூறப்படுகிறது.
