கேம் சேஞ்சர் படத்தின் வெளியீடு மற்றும் இந்தியன் 3 விவகாரம்
ராம் சரண் நடிப்பில், பிரபல இயக்குனர் ஷங்கர் இயக்கியுள்ள கேம் சேஞ்சர் படம், ஜனவரி 10ஆம் தேதி திரைக்கு வருவதாக அறிவிக்கப்பட்டுள்ளது. இதற்கிடையில், லைகா நிறுவனம் பரபரப்பை ஏற்படுத்தும் வகையில், “ஷங்கர் இந்தியன் 3 படத்தை இயக்க ஒப்புதல் அளிக்காவிடின், தமிழ்நாட்டில் கேம் சேஞ்சர் வெளியிட அனுமதிக்க முடியாது” என்று கூறியதாக தகவல்கள் வெளியாகி உள்ளன.
லைகா நிறுவனம் இதுவரை ஷங்கருக்கு இந்தியன் 2 படத்துக்கான 30 கோடி ரூபாய் சம்பள பாக்கியை வழங்கவில்லை என்றும், அத்துடன் இந்தியன் 3 படத்தின் மீதமுள்ள காட்சிகளை படமாக்க 50 கோடி ரூபாய் செலவாகும் என்று ஷங்கர் கூறியதாகத் தெரிகிறது. மேலும், தனது சம்பளத்தையும் சேர்த்து வழங்கினால் மட்டுமே இந்தியன் 3 படத்தை முழுமை பெறச் செய்வேன் என்று ஷங்கர் உறுதியளித்ததாக தகவல்.
கேம் சேஞ்சர் வெளியீட்டில் லைகாவின் தடை முயற்சி
இந்தியன் 3 விவகாரம் தீர்க்கப்படாமல் இருப்பதால், லைகா நிறுவனம் திரைப்பட கவுன்சிலை அணுகி, “இந்தியன் 3 இயக்க ஒப்புதல் அளிக்காமல் இருப்பின் கேம் சேஞ்சரை தமிழ்நாட்டில் வெளியிட அனுமதிக்க கூடாது” என கோரிக்கை வைத்துள்ளதாம். இதற்கு கேம் சேஞ்சர் படத்தின் தயாரிப்பாளர் தில்ராஜூ தனது எதிர்ப்பை தெரிவித்து, “இந்தியன் 3 என்பது லைகா நிறுவனத்துக்கும் ஷங்கருக்கும் இடையே உள்ள தனிப்பட்ட பிரச்னை. அதை முன்வைத்து இந்த படத்தின் வெளியீட்டுக்கு தடை கோருவது ஏற்றுக்கொள்ள முடியாது. கேம் சேஞ்சர் எனது சொந்த முதலீட்டில் தயாரிக்கப்பட்ட படம் எனவே இந்த படத்திற்கு உரிய ஆதரவை அளியுங்கள் என்று கூறியுள்ளார்.
