தமிழ் சினிமாவில் முன்னணி நடிகர்களில் ஒருவராக திகழ்பவர் ஷாம். அவர் தமிழ் திரையுலகில் 2001ஆம் ஆண்டு வெளியான ‛12பி’ என்ற படத்தின் மூலம் அறிமுகமானார். அதன் பின்னர் ‛உள்ளம் கேட்குமே’, ‛லேசா லேசா’ போன்ற தொடர்ச்சியான வெற்றி படங்களை கொடுத்து ரசிகர்களின் மனதில் நிலைத்தார். தற்போது ஷாம் குணச்சித்திர வேடங்களிலும் அதிக கவனம் செலுத்தி வருகிறார். அந்த வகையில் ஜெயம் ரவியின் ‛தில்லாலங்கடி’, விஜய்யின் ‛வாரிசு’ போன்ற திரைப்படங்களில் முக்கியமான கதாபாத்திரங்களில் நடித்து பாராட்டுக்களை பெற்றுள்ளார்.
தற்போது ஷாம் அரவிந்த் ராஜகோபால் இயக்கத்தில் உருவாகியுள்ள ஒரு ஆக்ஷன் திரில்லர் திரைப்படத்தில் கதாநாயகனாக நடித்துள்ளார். இந்தப் படத்திற்கு ‛அஸ்திரம்’ என்று பெயரிடப்பட்டுள்ளது. இப்படத்தில் நீரா மற்றும் வெண்பா ஆகியோர் கதாநாயகிகளாக நடித்துள்ளனர். இப்படத்தை பெஸ்ட் மூவிஸ் நிறுவனம் தயாரித்துள்ளது. படத்திற்கான இசையை கே.எஸ். சுந்தரமூர்த்தி அமைக்க, கல்யாண் வெங்கட்ராமன் ஒளிப்பதிவு செய்துள்ளார். மேலும், இப்படத்தின் வெளியீட்டு உரிமையை 5ஸ்டார் நிறுவனம் பெற்றுள்ளது.
இந்த படத்தின் படப்பிடிப்பு பணிகள் ஏற்கனவே நிறைவடைந்துள்ளன. அதன் பின்னர் இப்படத்தின் பர்ஸ்ட் லுக் போஸ்டரும் வெளியிடப்பட்டது. தற்போதைய தகவல்படி, இந்த படம் வரும் டிசம்பர் மாதத்தில் திரையரங்குகளில் வெளியாக உள்ளது. விரைவில் இதற்கான அதிகாரப்பூர்வ அறிவிப்பு வெளியாகும் என எதிர்பார்க்கப்படுகிறது.
