1990களில் அனைத்து பெண்களுக்கும் கனவு காதலனாக இருந்தவர் அரவிந்த்சாமி. ரஜினியின் தளபதி படத்தில் கலெக்டராக நடித்ததின் மூலம் ரசிகர்களுக்கு பரிச்சயமானவர். அதன் பிறகு ரோஜா படத்தில் நடித்து புகழ் பெற்றார்.பின்னர் பம்பாய், மின்சார கனவு, இந்திரா போன்ற வெற்றி படங்களில் நடித்தார். அவர் தமிழ் மட்டுமின்றி மலையாளம், தெலுங்கு உள்ளிட்ட மொழிகளிலும் நடித்துள்ளார்.
நடிகராக மட்டுமின்றி தொழிலதிபராகவும் இருந்து வந்த அரவிந்த்சாமி ஒரு விபத்தில் சிக்கினார். சில கால ஓய்வுக்குப் பிறகு தனி ஒருவன் படத்தின் மூலம் மீண்டும் திரையுலகில் இருந்து அனைவரையும் ஆச்சரியப்படுத்தினார். தனி ஒருவன் திரைப்படத்தில் சித்தார்த் அபிமன்யூ கதாபாத்திரத்தில் நடித்தது இன்று வரை பேசப்படுகிறது.
அடுத்து, கார்த்தி நடிப்பில் உருவாகி வரும் மெய்யழகன் படத்தில் நடித்துள்ளார். 96 படத்தின் இயக்குனர் பிரேம்குமார் இந்த படத்தை இயக்க, சூர்யாவின் 2D நிறுவனம் படத்தை தயாரிக்கிறது.இந்த படத்திற்கு கோவிந்த் வசந்தா இசையமைக்கிறார். ஏற்கனவே இந்த படத்தின் முதல் இரண்டு போஸ்டர்கள் நல்ல வரவேற்பைப் பெற்ற நிலையில், அரவிந்த்சாமியின் 54வது பிறந்தநாளை முன்னிட்டு அவருக்கு வாழ்த்து தெரிவிக்கும் வகையில் சிறப்பு போஸ்டரை படக்குழு வெளியிட்டுள்ளது. இந்த போஸ்டர் இணையத்தில் வைரலாகி வருகிறது.
