கடந்த 2022ஆம் ஆண்டில் அசோக் செல்வன், நாசர், மணிகண்டன், அஞ்சு குரியன், ரித்விகா மற்றும் பலர் நடித்த திரைப்படம் “சில நேரங்களில் சில மனிதர்கள்” வெளியானது. இந்த படத்தை அறிமுக இயக்குனராகிய விஷால் வெங்கட் இயக்கியிருந்தார். இப்படம் வெளியான பிறகு மக்களிடையே பெரும் வரவேற்பை பெற்றது மற்றும் வெற்றிப் படமாக அமைந்தது.
இதனைத் தொடர்ந்து, இயக்குனர் விஷால் வெங்கட் தனது அடுத்த படத்தினை அர்ஜூன் தாஸ் நடிப்பில் இயக்கி வருகிறார். படத்தின் தலைப்பு மற்றும் முதல் பார்வை வீடியோ தற்போது படக்குழுவால் வெளியிடப்பட்டுள்ளன. இப்படத்திற்கு “பாம்ப்” என பெயர் வைத்துள்ளனர்.
இந்த படத்தில் அர்ஜூன் தாஸுடன் காளி வெங்கட், ஷிவாத்மிகா, நாசர், அபிராமி, சிங்கம்புலி, பாலசரவணன் ஆகியோர் முக்கிய கதாபாத்திரங்களில் நடித்துள்ளனர். “பாம்ப்” திரைப்படத்தை சுதா சுகுமார் மற்றும் சுகுமார் பாலகிருஷ்ணன் இணைந்து ஜெம்பிரியோ பிக்சர்ஸ் நிறுவனத்தின் கீழ் தயாரித்துள்ளனர். இந்த படத்திற்கு டி. இமான் இசையமைத்துள்ளார். ராஜ்குமார் பி. எம் ஒளிப்பதிவை மேற்கொண்டு, பிரசன்னா ஜி. கே படத்தொகுப்பை செய்துள்ளார். படத்தின் இறுதிக்கட்ட படப்பிடிப்பு பணிகள் தற்போது நடைபெற்று வருகின்றன.
