நடிகை ஜோதிகா 1997-இல் வெளியான ‘டோலி சஜா கே ரஹ்னா’ என்ற இந்தி படம் மூலம் சினிமாவில் அறிமுகமானார். தமிழில் 1999-இல் நடித்த ‘வாலி’ படம் வெற்றி பெற்றதால், தொடர்ந்து தமிழ் படங்களில் நடித்து முன்னணி கதாநாயகியாக உயர்ந்தார். மலையாளம், தெலுங்கு படங்களிலும் நடித்துள்ளார். இவர் 2006-ஆம் ஆண்டு நடிகர் சூர்யாவை திருமணம் செய்துகொண்டார். அவர்களுக்கு தியா என்ற மகளும், தேவ் என்ற மகனும் உள்ளனர்.
நடிகை ஜோதிகாவும் சூர்யாவும் திருமணமாகி சுமார் 20 ஆண்டுகள் ஆகிய நிலையில், இன்றுவரை இருவரும் குறையாத காதலுடன் வாழ்ந்து வருகிறார்கள். இந்த ஜோடி பலருக்கு முன்மாதிரியாகவும் இருக்கிறார்கள். இந்தச் சூழலில், இவர்கள் இருவரும் சேர்ந்து கோலிவுட் நடிகைகளுக்கு ஒரு பார்ட்டி ஏற்பாடு செய்துள்ளனர். இந்த விருந்தில் நடிகைகள் திரிஷா, ரம்யா கிருஷ்ணன், ராதிகா சரத்குமார், நடன இயக்குநர் பிருந்தா, தொகுப்பாளர்கள் டிடி மற்றும் ரம்யா ஆகியோர் கலந்துகொண்டுள்ளனர். இங்கு அனைவரும் சேர்ந்து எடுத்துக் கொண்ட புகைப்படங்கள் இணையத்தில் வைரலாகி வருகின்றன.
ஜோதிகா தனது நண்பர்களுடன் எடுத்த புகைப்படங்களை தனது இன்ஸ்டாகிராம் ஸ்டோரியில் பகிர்ந்து, அவர்களைப் பற்றியும், அவர்களைச் சந்திப்பது குறித்தும் குறிப்பிட்டுள்ளார். அதில் திரிஷாவுடன் முன்பு எடுத்த புகைப்படத்தையும், இப்போது எடுத்த புகைப்படத்தையும் இணைத்து பதிவிட்டது இணையத்தில் வைரலாகி வருகிறது. அதில் அவர், “நேரம் பறந்து கொண்டிருக்கிறது. அது உங்களை உயரத்திற்குக் கூட்டிச் செல்கிறது” என்று குறிப்பிட்டுள்ளார்.
