பாலிவுட்டின் முன்னணி ஸ்டார் நடிகர்களில் ஒருவர் ஹிருத்திக் ரோஷன். இவரது நடிப்பில் கடந்த 2019-ம் ஆண்டு வெளியான திரைப்படம் ‘வார்’. இந்த படம் ரசிகர்களிடையே நல்ல வரவேற்பைப் பெற்றது. இதில் ஹிருத்திக் ரோஷனுடன் டைகர் ஷ்ராப் மற்றும் வாணி கபூர் ஆகியோர் முக்கிய கதாப்பாத்திரங்களில் நடித்திருந்தனர்.
அதனைத் தொடர்ந்து, யாஷ் ராஜ் பிலிம்ஸின் ஸ்பை யூனிவர்ஸுக்கான தொடராக ‘வார் 2’ திரைப்படத்தை தயாரித்து வருகின்றனர். இந்த படத்தில் ஹிருத்திக் ரோஷன் மீண்டும் மேஜர் கபீர் தலிவாலா என்ற கதாப்பாத்திரத்தில் நடித்துவருகிறார். இந்த படத்தை ‘பிரம்மாஸ்திரா’ திரைப்பட இயக்குனர் அயன் முகர்ஜி இயக்குகிறார். ஜூனியர் என்.டி.ஆர் மற்றும் கியாரா அத்வானி ஆகியோர் முக்கிய கதாப்பாத்திரங்களில் நடிக்கின்றனர்.
இந்த திரைப்படம் வருகிற ஆகஸ்ட் மாதம் 14-ம் தேதி வெளியாவதற்காக திட்டமிடப்பட்டுள்ளது. இந்நிலையில், இப்படத்திற்கு மிகவும் எதிர்பார்க்கப்பட்ட டீசர் எப்போது வெளியாகும் என்ற விவரம் தற்போது வெளியாகியுள்ளது. அதன்படி, ‘வார் 2’ படத்தின் டீசர் ஜூனியர் என்.டி.ஆரின் பிறந்தநாளை முன்னிட்டு வருகிற 20-ம் தேதி வெளியாகும் வகையில் படக்குழு திட்டமிட்டுள்ளதாக தகவல் வெளியாகியுள்ளது.
