விஜய் ஆண்டனி நடித்த ‘மார்கன்’ படத்தில் மாறுபட்ட கதாபாத்திரத்தில் நடித்தவர் அஜய் தீஷன். இவர் விஜய் ஆண்டனியின் அக்கா மகன், அதாவது அவருக்கு மருமகன். சில படங்களில் உதவி இயக்குநராகவும் பணியாற்றியுள்ளார். இந்நிலையில், தனது மருமகன் அஜய்க்காக ‘பூக்கி’ என்ற படத்தை விஜய் ஆண்டனி தயாரிக்கிறார். இன்று இந்த படத்தின் பூஜை நடைபெற்றது. சலீம் படத்தின் ஒளிப்பதிவாளர் கணேஷ் சந்திரா இப்படத்தை இயக்குகிறார்.
இந்த நிகழ்வில் விஜய் ஆண்டனி பேசியபோது, “நான் 10க்கும் மேற்பட்ட படங்களை தயாரித்துள்ளேன். ஆனால் நான் நடிக்காத முதல் படம் இதுதான். அடுத்து மற்ற ஹீரோக்களையும் வைத்து படங்களை தயாரிக்க இருக்கிறேன். நான் நடித்த ‘சலீம்’ படத்தின் ஒளிப்பதிவாளர் கணேஷ் இப்படத்தை இயக்குகிறார். பரிதி கதை எழுதியுள்ளார். இதில் தனுஷா ஹீரோயினாக நடிக்கிறார்,” என்றார்.
மேலும், பிச்சைக்காரன் படத்திற்கு பின் மீண்டும் சசி இயக்கத்தில் விஜய் ஆண்டனி நடிக்க உள்ளார். இது அதிக வாய்ப்பில் பிச்சைக்காரன் 3 ஆக இருக்கும் என கூறப்படுகிறது. இந்த படத்திலும் விஜய் ஆண்டனியின் மருமகன் அஜய் முக்கிய கதாபாத்திரத்தில் நடிக்கிறார்.
