இளையராஜா இசையில் உருவாகி வரும் ‘பேரன்பும் பெருங்கோபமும்’ திரைப்படத்திற்காக காதலர் தினத்தன்று ‘வாலண்டைன் போஸ்டர்’ வெளியிடப்பட்டது. பாலு மகேந்திராவின் ‘சினிமா பட்டறை’ மாணவரான அறிமுக இயக்குநர் சிவபிரகாஷ் இயக்கும் இப்படத்தில், ஒளிப்பதிவாளர் மற்றும் இயக்குநர் தங்கர் பச்சானின் மகன் விஜித் பச்சான் கதாநாயகனாக நடிக்க, அவருக்கு ஜோடியாக புதுமுக நடிகை ஷாலி நிவேகாஸ் அறிமுகமாகிறார். இவர்களுடன் மைம் கோபி, அருள் தாஸ், லோகு, சுபத்ரா, தீபா, சாய் வினோத் உள்ளிட்ட பலரும் நடித்துள்ளனர்.

ஜே.பி. தினேஷ்குமார் ஒளிப்பதிவு செய்துள்ள இந்த படத்திற்கு இசையமைப்பாளராக இளையராஜா பணியாற்றியுள்ளார். நல்ல சிந்தனை கொண்ட ஒரு சாதாரண மனிதரை மையமாகக் கொண்டு தயாரிக்கப்பட்டுள்ள இப்படத்தை E5 என்டர்டெயின்மெண்ட் நிறுவனம் சார்பில் காமாட்சி ஜெயகிருஷ்ணன் தயாரித்துள்ளார்.

படத்தைக் குறித்து இயக்குநர் சிவபிரகாஷ் கூறும்போது, “கதாநாயகனின் வாழ்க்கையில் மூன்று வெவ்வேறு காலக்கட்டங்களில் நடைபெற்ற சம்பவங்களை அடிப்படையாக வைத்து திரைக்கதை எழுதப்பட்டுள்ளது. சமூகத்தால் நிகழ்த்தப்பட்ட தீமைகளை நாயகன் எப்படி எதிர்கொண்டான் என்பதைக் காட்ட விரும்பியுள்ளோம். இதில் விறுவிறுப்பான காட்சிகளும், திருப்பங்களும் இடம் பெற்றுள்ளன” என்று தெரிவித்தார்.இந்த படத்தின் படப்பிடிப்பு பணிகள் முடிவடைந்து, தற்போது இறுதி கட்டப் பணிகள் தீவிரமாக நடைபெற்று வருகின்றன.