மராத்திய பேரரசர் சத்ரபதி சிவாஜி மற்றும் சாயிபாய் தம்பதியின் முதல்வராக பிறந்த சத்ரபதி சம்பாஜி மகாராஜாவின் வாழ்க்கை வரலாற்றை மையமாகக் கொண்டு உருவாக்கப்பட்ட திரைப்படம் தான் ‘சாவா’. இந்த படத்தை லக்ஸ்மன் உடேகர் இயக்கியுள்ளார், மேலும் இப்படத்திற்கு பிரபல இசையமைப்பாளர் ஏ.ஆர். ரகுமான் இசையமைத்துள்ளார்.
இந்த திரைப்படத்தில் பிரபல பாலிவுட் நடிகர் விக்கி கவுசல், சத்ரபதி சம்பாஜி மகாராஜாவாக நடித்துள்ளார். நடிகை ராஷ்மிகா மந்தனா, சம்பாஜியின் மனைவி மகாராணி ஏசுபாய் கதாபாத்திரத்தில் நடித்துள்ளார். அதோடு, நடிகர் அக்சய் கண்ணாவும் முக்கிய கதாபாத்திரத்தில் நடித்துள்ளார். ரூ.130 கோடி பட்ஜெட்டில் தயாரிக்கப்பட்ட இந்த திரைப்படம் காதலர் தினத்தை முன்னிட்டு நேற்று திரையரங்குகளில் வெளியானது. இதற்கு மக்கள் மத்தியில் நல்ல வரவேற்பு கிடைத்து வருகிறது.
இந்த நிலையில், இப்படத்தின் முதல் நாள் வசூல் தொடர்பான தகவல் வெளியாகியுள்ளது. அதன்படி, இப்படம் இந்திய அளவில் மட்டும் ரூ.33.1 கோடி வசூல் செய்துள்ளது. மேலும், உலக அளவில் சுமார் ரூ.50 கோடிக்கு மேல் வசூலித்திருக்கும் என எதிர்பார்க்கப்படுகிறது. இந்த ஆண்டில் இதுவரை வெளியான பாலிவுட் படங்களில் முதல் நாளில் அதிக வசூல் செய்த திரைப்படமாக ‘சாவா’ அமைந்துள்ளது.
