அறிமுக இயக்குநர் சிவபாலன் முத்துகுமார் இயக்கத்தில் உருவாகியுள்ள திரைப்படம் ‘ப்ளடி பெக்கர்’. இந்த படத்தை நெல்சன் திலீப்குமார் தயாரித்துள்ளார். கவின், மாருதி பிரகாஷ், ரெடின் கிங்ஸ்லி, சுனில் சுகதா உள்ளிட்ட பலர் இப்படத்தில் நடித்துள்ளனர். ஜென் மார்டின் இசையமைப்பில் உருவாகியுள்ள இந்த திரைப்படம் தீபாவளி பண்டிகையை முன்னிட்டு திரையரங்குகளில் வெளியிடப்பட உள்ளது என்பது குறிப்பிடத்தக்கது.
கவின் நடித்துள்ள ‘ப்ளடி பெக்கர்’ திரைப்படத்தின் டீசர் வெளியானது, ரசிகர்களிடத்தில் மிகுந்த வரவேற்பைப் பெற்றுள்ளது. யாசகராக நடித்துள்ள கவின் தனது வேடத்தில் அனைவரின் கவனத்தையும் ஈர்த்துள்ளார். சிக்னலில் யாசகராக தரையில் அமர்ந்து, ஆட்டோ டிரைவரிடம் பணம் கேட்கிறார் கவின். நான் சவாரி இல்லை என்று டிரைவர் கூற, “எனக்கு மட்டும் கால் இருந்திருந்தா நானும் உன்னைப் போல ஆட்டோ ஓட்டியிருப்பேன்” என்று முகத்தில் அப்பாவி சாயலை காட்டி பேசுகிறார்.
அப்பொழுது, சத்தமாக டிரம்ஸ் முழங்க ஒருவரின் இறுதி ஊர்வலம் சென்று கொண்டிருக்கிறது. அதைக் கண்டு உடனே எழுந்து நின்று குத்தாட்டம் போட்டு, பிறகு தனது வழியில் செல்கிறார் கவின். இதைப் பார்த்த ஆட்டோ டிரைவர் கோபமடைகிறார். இந்தப் படத்தில் கவின் அடையாளமாக இருப்பது அவரது கெட்டப்பாகும். ஆனால், படத்தின் கதையில் என்ன இருக்கிறது என்பதை ட்ரெய்லர் வந்த பிறகே நமக்கு புரியும். இப்போது டீசர் வெளியிடப்பட்டு, ட்ரெய்லர் விரைவில் வெளியாகும் என்று அறிவிக்கப்பட்டுள்ளது.
