ஜி.வி.பிரகாஷ் நடித்துள்ள ‘பிளாக்மெயில்’ படத்தின் ரிலீஸ் தள்ளிப்போனதா?

இசையமைப்பாளர் ஜி.வி. பிரகாஷ் கடைசியாக தயாரித்து நடித்த “கிங்ஸ்டன்” திரைப்படம் கலவையான விமர்சனங்களை பெற்றது. அதனைத்தொடர்ந்து அவர் நடித்துள்ள புதிய திரைப்படம் “பிளாக்மெயில்”.

“இரவுக்கு ஆயிரம் கண்கள்”, “கண்ணை நம்பாதே” போன்ற திரைப்படங்களை இயக்கிய மு. மாறன் இந்தப் புதிய திரைப்படத்தை இயக்கியுள்ளார். இந்தப் படத்தில் தேஜு அஸ்வினி, பிந்து மாதவி, திலக் ரமேஷ் ஆகியோர் முக்கிய கதாபாத்திரங்களில் நடித்துள்ளனர். இசையமைப்பாளர் சாம் சிஎஸ் இப்படத்திற்கு இசை அமைத்துள்ளார்.

திரில்லர் வகையைச் சேர்ந்த இந்த திரைப்படம் வருகிற ஆகஸ்ட் 1ஆம் தேதி திரைக்கு வரும் என அறிவிக்கப்பட்டிருந்த நிலையில், தற்போது அதன் வெளியீடு தள்ளிவைக்கப்பட்டுள்ளதாகத் தகவல் வெளியாகியுள்ளது. படத்தின் புதிய வெளியீட்டு தேதி விரைவில் அறிவிக்கப்படும் எனக் கூறப்பட்டுள்ளது.