நடிகர் சிவகார்த்திகேயன் நடிப்பில் வெளியான ‘மான் கராத்தே’ திரைப்படத்தை இயக்கிய திருக்குமரன், அதன் பின்பாக தற்போது அருண் விஜய் நடித்துள்ள ‘ரெட்ட தல’ எனும் புதிய திரைப்படத்தை இயக்கியுள்ளார்.
இப்படத்தில் அருண் விஜய்க்கு ஜோடியாக சித்தி இத்னானி நடித்துள்ளார். இவர் இதற்கு முன்பு சிம்பு நடித்த ‘வெந்து தணிந்தது காடு’ திரைப்படத்தில் கதாநாயகியாக நடித்திருந்தவர். இதனுடன், தான்யா ரவிச்சந்திரன் இப்படத்தில் முக்கிய வேடத்தில் நடித்துள்ளார். இசையமைப்பாளராக சாம் சி.எஸ் பணியாற்றியுள்ளார். அதிரடி சண்டைக் காட்சிகளை அன்பறிவு குழுவினர் கையாளுகின்றனர். இந்தப் படத்தை பிடிஜி யூனிவர்சல் நிறுவனம் தயாரித்துள்ளது.
இப்படத்தில் அருண் விஜய் இரு வேடங்களில் நடித்துள்ளார். படத்தின் படப்பிடிப்பு முழுமையாக முடிந்து, டப்பிங் பணிகளும் நிறைவடைந்துள்ளன. இந்நிலையில், ‘ரெட்ட தல’ திரைப்படத்தில் ஒரு பாடலை நடிகர் தனுஷ் பாடியுள்ளதாக படக்குழு அதிகாரப்பூர்வமாக புகைப்படத்தை வெளியிட்டு அறிவித்துள்ளது. இந்தப் பாடல் மெலடி பாடலாக உருவாக்கப்பட்டுள்ளது.மேலும் சமீபத்தில், இயக்குநர் பாலா இயக்கிய படத்தில் அருண் விஜய் நடித்ததுடன், நடிகர் தனுஷ் இயக்கியுள்ள ‘இட்லி கடை’ திரைப்படத்தில் வில்லன் கதாப்பாத்திரத்தில் அருண் விஜய் நடித்திருப்பதும் குறிப்பிடத்தக்கது.
