இயக்குநர் லோகேஷ் கனகராஜிடம் உதவி இயக்குநராக பணி புரியும் வாய்ப்பை கோவை காவல்துறை அறிவித்துள்ளது.
‘மாநகரம்’ படம் மூலமாகத் தமிழ் சினிமாவில் இயக்குநராக அறிமுகமானவர் இயக்குநர் லோகேஷ் கனகராஜ். தொடர்ந்து ‘கைதி’, ‘மாஸ்டர்’, ‘விக்ரம்’ ஆகிய படங்கள் மூலம் தமிழில் முன்னணி இயக்குநராக தற்போது அவர் வலம் வருகிறார். தனது படங்களில் தொடர்ந்து போதைப்பொருட்களுக்கு எதிரானக் கருத்துகளைப் பதிவு செய்து வருகிறார் லோகேஷ்.
இந்நிலையில், கோவை காவல் துறையும், தனியார் நிறுவனமும் இணைந்து குறும் படப் போட்டி ஒன்றை கல்லூரி மாணவர்களுக்கு அறிவித்துள்ளன. போதைப் பொருள் வழக்கத்தைத் தடுக்கும் வகையில் ஐந்து நிமிடங்களுக்கு மிகாமல் இந்தக் குறும் படம் அமைந்திருக்க வேண்டும். இதில் முதல் ஐந்து இடங்களுக்குள் வருபவர்களுக்கு இயக்குநர் லோகேஷூடன் உரையாடும் வாய்ப்பு கிடைக்கும். அதில் இருந்து ஒருவர் இயக்குநர் லோகேஷூடன் அடுத்தப் படத்தில் உதவி இயக்குநராக பணிபுரிவார் என்று அறிவித்துள்ளனர்.
இயக்குநர் லோகேஷ் கனகராஜ் ‘விக்ரம்’ படத்திற்கு அடுத்து நடிகர் விஜய்யின் 67-வது படத்தை இயக்குவார் என்பதும் குறிப்பிடத்தக்கது.
