சித்தா படத்தின் இயக்குநர் சு. அருண்குமார் இயக்கத்தில் உருவாகிவரும் புதிய திரைப்படம் “வீர தீர சூரன் – பாகம் 2”. இதில் நடிகர்கள் விக்ரம், எஸ்.ஜே. சூர்யா, மற்றும் சுராஜ் வெஞ்சரமூடு முக்கிய கதாபாத்திரங்களில் நடித்துள்ளனர். இரு பாகங்களாக உருவாகும் இப்படத்தின் படப்பிடிப்பு மதுரையில் சமீபத்தில் நிறைவடைந்தது. “தங்கலான்” படத்தின் வெற்றியால், விக்ரமின் இந்தப் புதிய படத்திற்கும் மிகுந்த எதிர்பார்ப்பு ஏற்பட்டுள்ளது. அடுத்த ஆண்டின் ஜனவரி மாதத்தில் திரையரங்குகளில் வெளியிட திட்டமிடப்பட்டுள்ள இப்படத்தின் டீசர் சமீபத்தில் வெளியிடப்பட்டு ரசிகர்கள் மத்தியில் பெரும் கவனம் பெற்றுள்ளது.
இந்த நிலையில், நடிகர் சுராஜ் வெஞ்சரமூடு ஒரு நேர்காணலில் பேசும்போது, தனது அனுபவத்தை பகிர்ந்துகொண்டார். அவர் கூறியதாவது: “வீர தீர சூரனில் உள்ள 16 நிமிட நீளமுள்ள சிங்கிள் ஷாட் காட்சியில் நடித்த அனுபவம் மிகப்பெரியது. அந்தக் காட்சியில் சண்டை, வசனங்கள், நடிப்பு, மற்றும் ஒரு விபத்து போன்ற அனைத்தும் இடம்பெற்றிருந்தன. முதலில், அக்காட்சிக்கான முழு ஒத்திகை செய்யப்பட்டது. ஒவ்வொன்றும் சரியாக நடந்து முடிந்தாலும், சிறிய குறை இருந்தது. அதை பார்த்த இயக்குநர் உணர்ச்சிவசப்பட்டு அழுதபடி மீண்டும் அந்தக் காட்சியை எடுக்க வேண்டியது தொடர்பாக எங்களை கேட்டுக்கொண்டார்.
மறுமுறை எடுக்கப்பட்டது. இரண்டாவது முறை சரியாக எடுத்துவிட்டதும், நானும் உணர்ச்சிவசப்பட்டேன். அது மிகவும் தனித்துவமான ஒரு காட்சி. அந்தக் காட்சிக்கு பிறகு, இயக்குநர் உட்பட அனைவரும் ஒருவரை ஒருவர் கட்டித்தழுவி கொண்டாடினோம். இந்த படம் கம்பீரமான சினிமாவாக இருக்கும் என்றுள்ளார்.
