மெடிக்கல் ரெப்பாக வேலை பார்க்கும் விஷால், தனது மனைவி துஷாரா விஜயன் மற்றும் குழந்தைகளுடன் சாதாரண குடும்ப வாழ்க்கை வாழ்கிறார். பல ஆண்டுகளாக கார் வாங்க வேண்டும் என்பது அவரது குடும்பத்தின் ஆசையாக இருந்தாலும், பணம் இல்லாததால் அது தொடர்ந்து தள்ளிப் போகிறது. நீண்ட கால சேமிப்புக்குப் பிறகு, இறுதியில் பழைய கார் ஒன்றை வாங்கி குடும்பத்தின் கனவை நிறைவேற்றுகிறார். அந்த மகிழ்ச்சியில் குடும்பத்துடன் வெளியூர் சுற்றுலாவுக்கும் செல்கிறார்.
ஆனால் அந்த பயணம் எதிர்பாராத துயரமாக மாறுகிறது. மர்ம கும்பல் ஒன்று காரை வழிமறித்து, துஷாரா விஜயனையும் சிறுமியையும் சுட்டுக் கொல்கிறது.அதன்பிறகு மகனுடன் காட்டுக்குள் தப்பிச் செல்லும் விஷால், ஒரு கட்டத்தில் தாக்குபவர்களையே வேட்டையாட ஆரம்பிக்கிறார். ஏன் இப்படி நடக்கிறது என்று மகன் கேட்கும் போது, அவர் தனது பெயரை மறைத்து “லிங்கா” என்று சொல்கிறார்.விஷாலின் வாழ்க்கையில் நடந்த உண்மை என்ன? லிங்கா யார்? இந்த இரட்டை அடையாளத்தின் பின்னால் என்ன ரகசியம் இருக்கிறது? என்பதையே படம் பரபரப்பாக வெளிப்படுத்துகிறது.
தந்தை மற்றும் மகன் என இரண்டு விதமான மனநிலைகளில் விஷால் நடித்துள்ளார். ஃபிளாஷ்பேக்கில் வரும் டான் கதாபாத்திரத்தில் முழு மாஸ் காட்டும் அவர், தற்போதைய கதையில் அமைதியான குடும்ப மனிதனாகவும் அனுதாபத்தை பெறுகிறார். ஆக்ஷன் காட்சிகளில் அவர் வழக்கமான எனர்ஜியை வெளிப்படுத்தியுள்ளார்.
துஷாரா விஜயன் குறைந்த காட்சிகளிலேயே தாக்கத்தை ஏற்படுத்துகிறார். அஞ்சலி வரும் ஃபிளாஷ்பேக் பகுதிகள் கதைக்கு எடை சேர்க்கின்றன. ஜான் விஜயின் நடிப்பும் கவனிக்க வைக்கிறது. யோகி பாபு, ஜாவா சுந்தரேசன் உள்ளிட்ட மற்ற நடிகர்களும் தங்களுக்கான இடத்தை நன்றாக பயன்படுத்தியுள்ளனர்.
ரிச்சர்ட் எம். நாதன் மற்றும் அபிநந்தன் ராமானுஜம் இணைந்து உருவாக்கிய ஒளிப்பதிவு, காடு மற்றும் இரவு காட்சிகளை மிகவும் தீவிரமாக காட்டுகிறது. ஜி.வி. பிரகாஷின் பின்னணி இசை படத்தின் பதட்டத்தை உயர்த்துகிறது; பாடல்களும் நினைவில் நிற்கும் வகையில் அமைந்துள்ளன. தந்தை – மகன் உறவு, பழிவாங்குதல் போன்ற பரிச்சயமான பாதையில் சென்றாலும், சில புதிய காட்சிகள் மற்றும் வேகமான திரைக்கதை படத்தை ஈர்க்கக்கூடியதாக மாற்றுகின்றன. நடிகராக மட்டுமல்ல, இயக்குநராகவும் விஷால் அசத்துகிறார். ஒட்டுமொத்தமாக கவனம் ஈர்க்கும் படமாக “மகுடம்” அமைந்துள்ளது.
