2006-ஆம் ஆண்டு வெளியான ‘கேங்ஸ்டர்’ திரைப்படம் மூலமாக திரையுலகில் அறிமுகமானவர் கங்கனா ரனாவத். அந்தப் படம் பெரும் வெற்றிப் பெறுவதுடன், சிறந்த நடிகைக்கான பிலிம்பேர் விருதையும் அவர் பெற்றார். அதன் பிறகு, ஜெயம் ரவி நடிப்பில் வெளியான ‘தாம் தூம்’ திரைப்படத்தின் மூலம் தமிழ்த்திரைப்படத்துறையிலும் தனது அரங்கேற்றத்தை பதிவு செய்தார்.
அதனைத் தொடர்ந்து, மறைந்த தமிழ்நாடு முதல்-அமைச்சர் ஜெ. ஜெயலலிதாவின் வாழ்க்கை வரலாற்றை மையமாகக் கொண்டு உருவான ‘தலைவி’ திரைப்படத்தில் நடித்தார். அதில் அவர் அளித்த நடிப்பும் ரசிகர்களிடையே பாராட்டைப் பெற்றது. சமீபத்தில், முன்னாள் பிரதமர் இந்திரா காந்தி நாடு முழுவதும் அமல்படுத்திய அவசரநிலையை மையமாகக் கொண்டு உருவாக்கப்பட்ட ‘எமர்ஜென்சி’ திரைப்படத்திலும் முக்கிய கதாபாத்திரத்தில் நடித்திருந்தார்.
இந்நிலையில், கங்கனா ரனாவத் ஹாலிவுட் திரைப்படத்தில் நடிக்க உள்ளார். ஸ்கார்லெட் ரோஸ் ஸ்டாலோன் மற்றும் ‘டீன் வுல்ப்’ புகழ் டைலர் போஸி ஆகியோருடன் இணைந்து ‘பிளஸ்டு பி தி ஈவில்’ எனும் ஹாலிவுட் திகில் திரைப்படத்தில் நடிக்கவிருக்கிறார். இந்தப் படத்தின் படப்பிடிப்பு நியூயார்க் நகரில் விரைவில் தொடங்கவுள்ளது.
