ஜாக்கி சான் நடிப்பில் அடுத்ததாக வெளிவரவிருக்கும் படம் ‘ஏ லெஜண்ட்’. இது, அவர் நடித்த ‘தி மித்’ படத்தின் இரண்டாம் பாகமாக தயாராகி வருகிறது. ஸ்டான்லி டாங் இயக்கியுள்ள இந்த படத்தில், ஜாக்கி சானுடன் சேர்ந்து லே சாங், நா ஜா, ஆரிப் லீ, லி சென், பெங் சியோவ்ரான் மற்றும் ஜெங் யெச்சென் ஆகியோர் முக்கிய கதாபாத்திரங்களில் நடித்துள்ளனர்.
இந்தப் படத்தின் கதையில் அனுபவம் வாய்ந்த அகழ்வாராய்ச்சி நிபுணர் மற்றும் இளம் வீரர் என இருவர் புதிய ஆராய்ச்சியில் ஈடுபடுகிறார்கள், அதனால் உருவாகும் பிரச்னைகள்தான் கதை. இதில் அனுபவம் வாய்ந்த ஆராய்ச்சியாளராகவும், இளம் வீரராகவும் ஜாக்கி சான் நடித்துள்ளார். அவரது இளமை தோற்றத்தை ‘கோட்’ படத்தில் நடிகர் விஜய்க்கு தொழில்நுட்பத்தின் உதவியுடன் உருவாக்கியதைப் போல, இதிலும் ஏஐ தொழில்நுட்பம் மூலம் மாற்றியுள்ளனர்.
இப்படத்தை இயக்கியிருக்கும் ஸ்டான்லி டாங், ஜாக்கி சானுடன் பல முறை இணைந்து பணியாற்றியுள்ளார். 1992 ஆம் ஆண்டு, தென்கிழக்கு ஆசிய நாடுகளில் பல வசூல் சாதனைகளை முறியடித்த அவரது ‘போலீஸ் ஸ்டோரி’ மற்றும் ‘மிமி: சூப்பர் காப்’ படங்கள் மிகப்பெரிய வெற்றியை பெற்றது. மேலும், அவர் ‘ரம்பிள் இன் தி பிராங்க்ஸ்’, ‘போலீஸ் ஸ்டோரி 4: பர்ஸ்ட் ஸ்ட்ரைக்’, ‘தி மித்’, ‘குங் பூ யோகா’ படங்களையும் இயக்கியுள்ளார்.
‘ஏ லெஜண்ட்’ (‘தி மித் 2’) திரைப்படத்திற்காக ஜாக்கி சானும் ஸ்டான்லி டாஙும் மீண்டும் இணைந்திருப்பது மிகுந்த எதிர்பார்ப்பை ஏற்படுத்தியுள்ளது. வெளிநாடுகளில் தயாரிக்கப்பட்ட இந்தப் படத்தை இந்தியாவில் தமிழ், தெலுங்கு, ஹிந்தி மற்றும் ஆங்கில மொழிகளில் விஸ்வாஸ் ஃபிலிம்ஸ் வெளியிடுகிறது.
