‘ரோமியோ’ படத்தின் வெற்றியைத் தொடர்ந்து மீரா விஜய் ஆண்டனி தயாரிப்பில், லியோ ஜான் பால் இயக்கத்தில் விஜய் ஆண்டனி நடிக்கும் புதிய படமான ‘ககன மார்கன்’ உருவாகி வருகிறது. எடிட்டிங் துறையில் அட்டக்கத்தி, பீட்சா, சூது கவ்வும், இன்று நேற்று நாளை, தெகிடி, முண்டாசுப்பட்டி, காதலும் கடந்து போகும், ஏ1, மாயவன் போன்ற படங்களில் பணியாற்றியவர் படத்தொகுப்பாளர் லியோ ஜான் பால்.

இந்த படத்தில் விஜய் ஆண்டனி ஒரு உயர் போலீஸ் அதிகாரியாக மாறுபட்ட தோற்றத்தில் நடித்துள்ளார். ககன் மார்கன் என்ற பெயர் சித்தர்களின் அகராதியில் ‘காற்றின் வழியாக பயணிப்பவன்’ என பொருள் தரும். குடும்பத்துடன் மகிழ்ச்சியுடன் கண்டு ரசிக்கக்கூடிய படமாக இது இருக்கும் என எதிர்பார்க்கப்படுகிறது. இசையமைப்பும் விஜய் ஆண்டனி தானே செய்துள்ளார். இவருடன் இணைந்து, அஜய் தீஷன், சமுத்திரக்கனி, மகாநதி சங்கர், பிரிகடா, வினோத் சாகர் ஆகியோர் போலீஸ் அதிகாரிகளாக நடித்துள்ளனர். மேலும், தீப்ஷிகா, கலக்கப்போவது யாரு புகழ் அர்ச்சனா, கனிமொழி, அந்தகாரம் நட்ராஜன் ஆகியோருக்கும் முக்கிய கதாபாத்திரங்கள் வழங்கப்பட்டுள்ளன.

கடந்த மாதம் வெளியான படத்தின் ஃபர்ஸ்ட் லுக் போஸ்டர் ரசிகர்களிடையே நல்ல வரவேற்பைப் பெற்றது. தற்போது செகண்ட் லுக் வெளியீடாகி, படத்தின் மீதான எதிர்பார்ப்பை மேலும் உயர்த்தியுள்ளது. படம் விரைவில் திரையரங்குகளில் வெளியாக உள்ளது என்பதால் இது எந்த வகையான கதைக்களம் கொண்டிருக்கும் என ரசிகர்கள் ஆவலுடன் எதிர்நோக்கி வருகின்றனர்.