பாலிவுட் சினிமாவில் சிறப்பு பாடல்களில் நடனமாடி பெரும் ரசிகர்களைக் கவர்ந்தவர் ஜாக்குலின் பெர்னாண்டஸ். சமீபத்தில் இவர் “ரெய்டு 2” திரைப்படத்தில் ஒரு சிறப்பு பாடலுக்கு நடனமாடியிருந்தார்.
சிறப்பு பாடல்களிலேயே அல்லாமல், “கிக்”, “ஜுட்வா 2”, “ஹவுஸ்புல்”, மற்றும் “பதே” போன்ற பாலிவுட் திரைப்படங்களில் முக்கிய கதாப்பாத்திரங்களிலும் நடித்துள்ளார். இந்நிலையில், டோலிவுட் இயக்குநர் வி. ஜெயசங்கர் இயக்கவிருக்கும், பெண்ணை மையமாக கொண்ட ஆக்ஷன் திரில்லர் திரைப்படத்தில் ஜாக்குலின் நடிக்க உள்ளதாக தகவல்கள் வெளியாகியுள்ளன.
ஜாக்குலின் இந்தப் படத்தில் இதுவரை நடித்திராத வகையான ஒரு புதிய கதாப்பாத்திரத்தில் நடிக்க இருப்பதாக கூறப்படுகிறது. இந்தப் படத்தை தமிழ், தெலுங்கு, கன்னடம், மலையாளம் மற்றும் இந்தி மொழிகளில் உருவாக்க திட்டமிடப்பட்டிருப்பதும் தெரியவந்துள்ளது. விரைவில் இப்படம் தொடர்பான அதிகாரப்பூர்வ அறிவிப்பு வெளியாகும் என எதிர்பார்க்கப்படுகிறது.
