பிரேம்குமார் இயக்கத்தில், விஜய் சேதுபதி மற்றும் திரிஷா நடிப்பில் 2018ஆம் ஆண்டு வெளியான படம் ’96’. அதன் வெற்றியைத் தொடர்ந்து, 2020ஆம் ஆண்டு ‘ஜானு’ என்ற பெயரில் இப்படத்தை தெலுங்கில் ரீமேக் செய்தார் பிரேம்குமார். அந்த ரீமேக்கில் சர்வானந்த் மற்றும் சமந்தா முக்கிய வேடங்களில் நடித்தனர்.
பின்னர், கார்த்தி மற்றும் அரவிந்த்சாமி நடிப்பில் ‘மெய்யழகன்’ என்ற ஒரு புதிய திரைப்படத்தை இயக்கினார். தற்போது, ’96’ படத்தின் இரண்டாம் பாகத்தை இயக்கும் திட்டத்தில் உள்ளார்.இந்தச் சூழலில் நடைபெற்ற ஒரு நிகழ்ச்சியில் பங்கேற்ற இயக்குநர் பிரேம்குமார், ‘96’ இரண்டாம் பாகம் குறித்து பேசிய போது, இந்தப் படத்தின் ஆரம்பக்கட்ட பணிகள் தற்போது நடைபெற்று வருகின்றன எனத் தெரிவித்தார். முதல் பாகத்தில் நடித்த விஜய் சேதுபதி மற்றும் திரிஷா இருவரும் இந்த இரண்டாம் பாகத்திலும் நடிக்க ஒப்புக்கொண்டுள்ளனர்.
படத்தின் கதையை இருவரிடமும் கூறியபோது அவர்கள் மிகவும் ஈர்க்கப்பட்டதாகவும், விரைவில் இப்படத்தைச் சார்ந்த அதிகாரப்பூர்வ அறிவிப்பு வெளியாகும் எனவும் இயக்குநர் பிரேம்குமார் தெரிவித்துள்ளார்.
