தமிழ் திரைப்படத் துறையில் முன்னணி நடிகராக வலம் வரும் விஜய் சேதுபதியின் மகன் சூர்யா. இவர் ஏற்கனவே தனது தந்தையுடன் இணைந்து ‘சிந்துபாத்’ என்ற திரைப்படத்தின் வாயிலாக திரைப்பட உலகிற்கு அறிமுகமானவர். இந்நிலையில், சூர்யா தற்போது கதாநாயகனாக அறிமுகமாகும் படம் ‘பீனிக்ஸ்’. இந்தப் படத்தை அனல் அரசு இயக்கியுள்ளார். இதன் மூலம் அனல் அரசு இயக்குநராகும் தனது முதல் படத்தை வெளிக்கொணர்கிறார்.
பிரேவ் மேன் பிக்சர்ஸ் நிறுவனம் தயாரிக்கும் இந்தப் படத்திற்கு இசையமைப்பாளராக சாம் சி.எஸ் பணியாற்றுகிறார். சமீபத்தில் வெளியான இப்படத்தின் டீசர் பார்வையாளர்களிடையே நல்ல வரவேற்பைப் பெற்றது. இப்படத்தில் சூர்யாவுடன் இணைந்து நடிகை வரலட்சுமி சரத்குமார், நடிகர் சம்பத் மற்றும் நடிகை தேவதர்ஷினி உள்ளிட்டோர் முக்கிய கதாபாத்திரங்களில் நடித்துள்ளனர்.
முன்னதாக வெளியான டீசரில், ஆரம்பக் காட்சி சிறுவர் சீர்திருத்தச் சிறையை மையமாகக் கொண்டது. குற்றவாளியாக கையில் விலங்கு கட்டப்பட்ட நிலையில், முகம் மறைந்தவராக சூர்யா சீர்திருத்த பள்ளியில் காணப்பட்டார். தொடர்ந்து, ஒரு பாக்ஸிங் வீரராகச் சண்டைக் காட்சிகளில் தீவிரமாக ஈடுபடுகிறார். ஆக்ஷன் கதைக்களத்தில் உருவாகியுள்ள இந்த படம் ரசிகர்கள் மத்தியில் நல்ல வரவேற்பைப் பெறும் என எதிர்பார்க்கப்படுகிறது. இப்படத்தின் முதல் பாடலான ‘யாராண்ட’ வெளியானதும் இணையத்தில் வைரலானது. தற்போது, ‘பீனிக்ஸ்’ படம் ஜூலை 4ம் தேதி திரையரங்குகளில் வெளியாகும் என படக்குழு அறிவித்துள்ளதோடு, இப்படத்தின் டிரெய்லரும் அதிகாரப்பூர்வமாக வெளியிடப்பட்டுள்ளது.
