சிவகார்த்திகேயனை சந்தித்து வாழ்த்துக்கள் பெற்ற ‘ஆலப்புழா ஜிம்கானா’ படக்குழு!

மம்முட்டி நடித்த அதிரடி போலீஸ் ஆக்சன் திரைப்படமான ‘உண்ட’யை இயக்கியவர் இயக்குநர் காலித் ரஹ்மான். அதன் பின்னர் டொவினோ தாமஸ் நடித்த ‘தள்ளுமால’ என்ற இன்னொரு ஆக்சன் திரைப்படத்தையும் இயக்கினார். தற்போது இவர் குத்துச்சண்டை பின்னணியில் உருவாக்கிய புதிய திரைப்படம் ‘ஆலப்புழா ஜிம்கானா’ ஆகும்.

பிரேமலு என்ற மிகப்பெரிய வெற்றிப் படத்தில் கதாநாயகனாக நடித்த நஸ்லேன், இந்த புதிய படத்தில் கதாநாயகனாக நடித்துள்ளார். கதாநாயகியாக அனகா ரவி நடித்துள்ளார்.

இந்த படம் நாளை (ஏப்ரல் 10) வெளியிடப்பட இருக்கிறது. இதனையொட்டி, இப்படத்தின் குழுவிற்கு சென்னையில் நடிகர் சிவகார்த்திகேயனை நேரில் சந்திக்கும் வாய்ப்பு கிடைத்தது. அவரை சந்தித்த படக்குழுவினர், அவரிடம் படத்தின் டிரைலரை காட்டினர். டிரைலரை பார்த்த சிவகார்த்திகேயன் மிகவும் மகிழ்ச்சி அடைந்ததோடு, படக்குழுவினருக்கு தனது மனமார்ந்த பாராட்டையும், படத்திற்கான வெற்றிக்காக தனது வாழ்த்துகளையும் தெரிவித்தார்.