தமிழ் சினிமாவில் தரமான திரைப்படங்களை வழங்கிய நிறுவனமாக விளங்கும் ‘சூப்பர் குட் பிலிம்ஸ்’ நிறுவனத்தின் 99வது தயாரிப்பாக உருவாகும் புதிய படத்தில், விஷால் கதாநாயகனாகவும், துஷாரா விஜயன் கதாநாயகியாகவும் நடிக்கின்றனர். ‘ஈட்டி’, ‘ஐங்கரன்’ போன்ற படங்களை இயக்கிய ரவி அரசு இந்த படத்தை இயக்குகிறார். இப்படத்தின் பூஜை இன்று சென்னையில் நடைபெற்றது. நடிகர் கார்த்தி க்லாப் அடித்து படப்பிடிப்பை துவக்கி வைத்தார்.
படம் குறித்து விஷால் தனது எக்ஸ் பக்கத்தில், “இதோ ஆரம்பிக்கிறோம்! ‘மதகஜராஜா’ பட வெற்றியைத் தொடர்ந்து என் 35வது திரைப்படமாக இந்த படம் உருவாகிறது. சூப்பர் குட் பிலிம்ஸ் நிறுவனம் தயாரிக்கின்ற இந்தப் படம், தயாரிப்பாளர் ஆர்பி சவுத்ரி அவர்களின் 99வது படம் என்பது மிகுந்த மகிழ்ச்சி. இயக்குநர் ரவி அரசுடன் எனது முதல் கூட்டணியாகும். துஷாரா விஜயன் முதன்முறையாக என்னுடன் திரையைப் பகிர்கிறார். ‘மதகஜராஜா’ படத்திற்கு பிறகு ஒளிப்பதிவாளராக ரிச்சர்ட் எம் நாதன் மற்றும் ‘மார்க் ஆண்டனி’ படத்திற்குப் பிறகு இசையமைப்பாளராக ஜீவி பிரகாஷ்குமார் மீண்டும் எனது அணியில் சேர்ந்துள்ளனர்.
படத்தொகுப்பு ஸ்ரீகாந்த், தயாரிப்பு வடிவமைப்பாளர் துரைராஜ், ஸ்டைலிங் வாசுகி பாஸ்கர் என மிகச் சிறந்த தொழில்நுட்பக் குழு இணைந்துள்ளது. சென்னையில் 45 நாட்கள் முதல் கட்ட படப்பிடிப்பை முழு ஆற்றலுடன் தொடங்குகிறோம். உங்கள் ஆசீர்வாதமும் ஆதரவும் தேவை. இறைவன் ஆசீர்வதிக்கட்டும்! என தெரிவித்துள்ளார்.
