வெங்கட் பிரபு இயக்கத்தில் விஜய் நடித்த “தி கோட்” படம் சில தினங்களுக்கு முன்பு வெளியானது. இப்படத்தின் முதல் நாள் வசூல் 126 கோடி என தயாரிப்பு நிறுவனம் அதிகாரப்பூர்வமாக அறிவித்தது. அடுத்த இரண்டு நாட்களுக்கான வசூல் இன்னும் அறிவிக்கப்படவில்லை. இருந்தாலும், 200 கோடியை நிச்சயம் கடந்திருக்கும் என பாக்ஸ் ஆபீஸ் வட்டாரங்கள் தெரிவிக்கின்றன. இந்தப் படத்துடன் சேர்த்தால், விஜய்யின் 8வது 200 கோடி படம் இது என்ற பெருமையைப் பெறுகிறது.
இதற்கு முன்பு, விஜய் நடித்த “மெர்சல்,” “சர்க்கார்,” “பிகில்,” “மாஸ்டர்,” “பீஸ்ட்,” “லியோ” ஆகிய படங்கள் 200 கோடிக்கும் அதிகமான வசூலைக் கடந்தன. தமிழ் சினிமாவில் வேறு எந்த நடிகரும் இத்தனை 200 கோடி படங்களைக் கொடுத்ததில்லை. தற்போது பான் இந்தியா நடிகராக உயர்ந்துள்ள பிரபாஸ் கூட அதற்கும் குறைவான 200 கோடி படங்களையே கொடுத்திருக்கிறார்.
மேலும், முதல் நாள் வசூலில் 100 கோடி வசூலைத் தந்த தமிழ் நடிகர்களில் விஜய் இரண்டு 100 கோடி படங்களைக் கொடுத்துள்ளார். ஒன்று “லியோ,” மற்றொன்று “தி கோட்.” தமிழகம், வெளிநாடுகளில் தற்போது “தி கோட்” படம் எதிர்பார்த்த வசூலைக் கொடுத்து வருகிறது என்று தகவல்கள் கூறுகின்றன. தமிழகத்தில் மட்டும் 100 கோடி வசூலை இன்று கடக்கும் என்று எதிர்பார்க்கப்படுகிறது.
