‘மஞ்சும்மல் பாய்ஸ்’ திரைப்படத்தின் மூலம் இந்திய அளவில் கவனம் பெற்ற இயக்குநர் சிதம்பரம், தற்போது ‘பாலன் தி பாய்’ என்ற புதிய திரைப்படத்தை இயக்கியுள்ளார். இந்த திரைப்படத்திற்கான கதையை ‘ஆவேஷம்’ திரைப்படத்தின் இயக்குநரான ஜித்து மாதவன் எழுதியுள்ளார். படத்திற்கு இசையமைப்பாளர் சுஷின் ஷியாம் இசையமைத்துள்ளதுடன், ஒளிப்பதிவை சிஜு காலித் மேற்கொண்டுள்ளார். கே.வி.என் நிறுவனம் மற்றும் தேஸ்பியன் பிலிம்ஸ் நிறுவனங்கள் இணைந்து தயாரித்துள்ள இந்த திரைப்படத்தில் முழுமையாக புதுமுக நடிகர்கள் மற்றும் நடிகைகள் நடித்துள்ளனர்.
‘பாலன்’ என்ற பெயருக்கு மலையாள திரைப்பட வரலாற்றில் தனிப்பட்ட முக்கியத்துவம் உள்ளது. 1938ஆம் ஆண்டு வெளியான மலையாள சினிமாவின் முதல் ஒலிப்படத்தின் பெயரும் ‘பாலன்’ என்பதே ஆகும். மேலும், ‘விகதகுமாரன்’ மற்றும் ‘மார்த்தாண்ட வர்மா’ திரைப்படங்களுக்குப் பிறகு மலையாள மொழியில் வெளியான மூன்றாவது திரைப்படமாகவும் ‘பாலன்’ இடம்பிடித்துள்ளது. அந்த வரலாற்றுச் சிறப்புமிக்க பெயரையே இந்த புதிய திரைப்படத்திற்கும் வைத்திருப்பது ரசிகர்களின் கவனத்தை ஈர்த்துள்ளது. ‘பாலன் தி பாய்’ திரைப்படத்தின் டிரெய்லர் மற்றும் முதல் பாடல் வெளியாகியதிலிருந்தே சமூக வலைதளங்களில் நல்ல வரவேற்பைப் பெற்றது. படத்தின் காட்சியமைப்பு, இசை மற்றும் கதைக்களம் குறித்த எதிர்பார்ப்புகள் ரசிகர்களிடையே அதிகரித்து வந்தன. இதனால் படத்தின் மீதான ஆர்வம் நாளுக்கு நாள் அதிகரித்து வருகிறது.
இந்த நிலையில், பிரபல இயக்குநர் பிரியதர்ஷன் ‘பாலன் தி பாய்’ திரைப்படத்தை பாராட்டி பேசிய வீடியோவை தயாரிப்பு நிறுவனம் வெளியிட்டுள்ளது. அதில் அவர், “மலையாள திரையுலகில் எப்போதும் நினைவில் நிற்கக்கூடிய மிகச்சிறந்த திரைப்படங்களில் ஒன்றாக ‘பாலன்’ இருக்கும். இதற்கு நான் உத்திரவாதம் அளிக்கிறேன். படத்தில் பணியாற்றிய அனைவரின் பங்களிப்பும் மிகச் சிறப்பாக ஒன்றிணைந்துள்ளது. சுமார் 2 மணி 40 நிமிடங்கள் ஓடும் இந்த திரைப்படத்தில் எங்கும் சலிப்பு ஏற்படவில்லை. படம் முடிந்து திரையரங்கை விட்டு வெளியேறிய பிறகும் அதன் தாக்கம் மனதில் நீடிக்கிறது. இது நம்ப முடியாத ஒரு மாயாஜால அனுபவம்” என்று பாராட்டியுள்ளார். பெரும் எதிர்பார்ப்பை ஏற்படுத்தியுள்ள இந்த திரைப்படம் வருகிற ஜூன் 19ஆம் தேதி திரையரங்குகளில் வெளியாக உள்ளது.
—
