பரதன் இயக்கத்தில் கமல் ஹாசன், சிவாஜி கணேசன், ரேவதி, கவுதமி, நாசர், வடிவேலு, தலைவாசல் விஜய், சங்கிலி முருகன் உள்ளிட்டோர் நடித்த படம் ‘தேவர் மகன்’. பி.சி. ஸ்ரீராம் ஒளிப்பதிவை மேற்கொண்டிருந்தார். இளையராஜா இசையமைத்திருந்தார். கமலின் ராஜ்கமல் பிலிம்ஸ் இன்டர்நேஷனல் நிறுவனம் இப்படத்தைத் தயாரித்தது.
1992ஆம் ஆண்டு அக்டோபர் 25ஆம் தேதி தீபாவளி நாளில் இப்படம் திரையரங்குகளில் வெளியானது. வெளியானவுடன் பெரிய வெற்றி பெற்ற இந்த படம், அந்த ஆண்டின் சூப்பர் ஹிட் திரைப்படமாக அமைந்தது. 5 தேசிய விருதுகளை வென்றது. மேலும், அன்றைய ஆண்டில் இந்தியாவைச் சேர்ந்த திரைப்படமாக வெளிநாட்டு பிரிவில் ஆஸ்கர் பரிந்துரைக்காக அனுப்பப்பட்டது.
‘தேவர் மகன்’ திரைப்படம் வெளியாகி இன்று 33 ஆண்டுகள் நிறைவு பெறுகிறது. இதையொட்டி, கமலின் ராஜ்கமல் நிறுவனம் எக்ஸ் தளத்தில், “என் குழந்தைக்கு வயது 33. அதை உயிருடன் மற்றும் ஆரோக்கியமாக வைத்திருந்ததற்கு உங்கள் அனைவருக்கும் நன்றி. – உங்கள் நான்” என கமல் ஹாசன் தெரிவித்ததாக பதிவு செய்துள்ளது.
