மலையாளத் திரையுலகத்தின் முன்னணி நட்சத்திர நடிகரான பிருத்விராஜின் பிறந்த நாளான இன்று, ‘சலார்’ படத்தில் அவர் நடிக்கும் ‘வரதராஜ மன்னார்’ எனும் கதாபாத்திரத்தின் தோற்றப் புகைப்படத்தை வெளியிட்டு, படக் குழுவினர் வாழ்த்து தெரிவித்துள்ளனர்.
‘பாகுபலி’ படத்தின் நட்சத்திரமான பிரபாஸ், ‘கே.ஜி.எஃப்.’ படத்தின் தயாரிப்பாளரான ஹோம்பாலே பிலிம்ஸ், ‘கே.ஜி.எஃப்.’ இயக்குநர் பிரசாத் நீல் மற்றும் தொழில் நுட்ப வல்லுநர்கள் ஆகியோருடன் இணைந்து இந்திய ரசிகர்களுக்காக ‘சலார்’ என்ற பிளாக் பஸ்டர் ஹிட் திரைப்படத்தை தயாரித்து வருகிறார்கள்.
இந்தப் படத்தில் பான் இந்திய நட்சத்திர நடிகர் பிரபாஸ் நாயகனாக நடிக்க, அவருக்கு ஜோடியாக ஸ்ருதிஹாசன் நடித்திருக்கிறார். இவர்களுடன் பன்முக ஆளுமை திறன் கொண்ட நடிகர் பிரித்விராஜ் சுகுமாரன், ‘வரதராஜ மன்னார்’ எனும் அற்புதமான கதாபாத்திரத்தில் நேர்த்தியாக நடித்திருக்கிறார். மேலும் ஜெகபதிபாபு, ஈஸ்வரி ராவ், ஸ்ரேயா ரெட்டி உள்ளிட்ட பலர் நடித்திருக்கிறார்கள்.
‘சலார்’ படத்தைப் பற்றிய புதிய தகவலை ரசிகர்களிடம் பகிர்ந்து கொள்வதற்காக பட குழுவினர், நடிகர் பிருத்விராஜின் இன்றைய பிறந்த நாளை ஒரு வாய்ப்பாகக் கருதி, அவர் நடித்திருக்கும் ‘வரதராஜ மன்னார்’ எனும் கதாபாத்திரத் தோற்றப் புகைப்படத்தை இன்று வெளியிட்டிருக்கிறார்கள்.
“ஏராளமான ரசிகர்கள் பட்டாளத்தை கொண்டிருக்கும் நட்சத்திர நடிகரான பிரித்விராஜ் சுகுமாரன், ‘வரதராஜ மன்னார்’ எனும் கதாபாத்திரத்தில் நடித்திருப்பதால், ‘சலார்’ படத்தைப் பற்றிய நேர் நிலையான எதிர்பார்ப்பை ரசிகர்களிடம் ஏற்படுத்தியிருக்கிறார்…” என பட குழுவினர் உற்சாகமாக தெரிவிக்கிறார்கள்.
‘சலார்’ படத்தில் இடம் பெறும் ‘வரதராஜ மன்னார்’ எனும் கதாபாத்திரம், கதையின் நாயகனான பிரபாஸிற்கு இணையான கதாபாத்திரமாக படத்தில் இடம் பெற்றிருக்கிறது. இந்த இரண்டு முன்னணி நட்சத்திரங்களின் அற்புதமான நடிப்பை காண்பதற்கு ரசிகர்களிடம் பெரும் ஆர்வம் ஏற்பட்டிருக்கிறது.
பிருத்விராஜின் கதாபாத்திரம் குறித்து இயக்குநர் பிரசாந்த் நீல் பேசுகையில், “பிருத்விராஜ் போன்ற முன்னணி நட்சத்திர நடிகர், ‘சலார்’ படத்தில் இருப்பது மிகுந்த மகிழ்ச்சியை அளிக்கிறது. இந்த படத்தில் இடம்பெற்றிருக்கும் வரதராஜ மன்னார் எனும் கதாபாத்திரத்திற்கு பொருத்தமான வேறு நடிகரை நாங்கள் பெற்றிருக்க இயலாது. படத்தில் அவர் ‘வரதராஜ மன்னார்’ கதாபாத்திரத்தில் தன்னைப் பொருத்திக் கொண்டு நடித்த விதம், அவரது அற்புதமான நடிப்புத் திறமையை நிரூபிக்கிறது. அவரது தனித்துவமான நடிப்பு, ரசிகர்களை பெரிதும் ஈர்க்கும். மிகப் பெரிய ரசிகர் பட்டாளத்தை கொண்டிருக்கும் பிரித்விராஜ், பிரபாஸுடன் இணைந்து நடித்திருப்பதும், இவ்விருவரையும் நான் இயக்கியதும் எனக்குக் கிடைத்த அற்புதமான அனுபவம்…” என்றார்.
இந்தப் படம் 2023 ஆம் ஆண்டு செப்டம்பர் 28-ம் தேதி அன்று தமிழ், தெலுங்கு, இந்தி, கன்னடம், மலையாளம் என ஐந்து மொழிகளில் வெளியாகிறது.
