பாரதி கண்ணம்மா, பாண்டவர் பூமி, வெற்றிக் கொடிகட்டு, தவமாய் தவமிருந்து போன்ற பல வெற்றிப்படங்களை இயக்கியவர் இயக்குனர் சேரன். அவர் 2004ஆம் ஆண்டு தானே தயாரித்து, இயக்கி, நாயகனாக நடித்த திரைப்படம் ஆட்டோகிராப். இதில் சினேகா, கோபிகா, மல்லிகா, கனிகா, இளவரசு ஆகியோர் முக்கிய கதாபாத்திரங்களில் நடித்திருந்தனர். இப்படம் மூன்று பிரிவுகளில் தேசிய விருதுகளை வென்றது.
இத்திரைப்படத்தில், பள்ளி பருவம், கல்லூரி பருவம், இளமை பருவம் என வாழ்க்கையின் மூன்று கட்டங்களில் கதாநாயகன் சந்திக்கும் காதல் அனுபவங்களை இயக்குனர் சேரன் அழகாக வெளிப்படுத்தியிருந்தார். மல்லிகா, கோபிகா, சினேகா, கனிகா உள்ளிட்டோர் நடித்த இந்த திரைப்படம் மிகப்பெரிய வெற்றியைப் பெற்றது. வெளியான காலத்தில் ஆட்டோகிராப் படம் 100 நாட்களுக்கு மேல் ஓடி வசூல் சாதனை படைத்தது. மேலும் மூன்று தேசிய விருதுகளையும் பெற்றது. குறிப்பாக, “ஒவ்வொரு பூக்களுமே” பாடலைப் பாடிய சித்ரா மற்றும் அதன் பாடல் வரிகளை எழுதிய பா. விஜய் ஆகிய இருவரும் தேசிய விருது பெற்றனர்.
இப்படம் மீண்டும் வெளியீடு செய்யப்படுவதையொட்டி, புதிய ஏ.ஐ. தொழில்நுட்பத்தைப் பயன்படுத்தி உருவாக்கப்பட்ட டிரெய்லர் வீடியோவை இயக்குனர் லோகேஷ் கனகராஜ் கடந்த பிப்ரவரி 19ஆம் தேதி வெளியிட்டார். இதனையடுத்து, படம் கடந்த மே 16ஆம் தேதி மீண்டும் திரையரங்குகளில் வெளிவரும் என அறிவிக்கப்பட்டிருந்தது. தற்போது புதிய அறிவிப்பின் படி, 21 ஆண்டுகளுக்குப் பிறகு ஆட்டோகிராப் படம் வரும் நவம்பர் 14ஆம் தேதி ரீ-ரிலீஸாக திரையரங்குகளில் வெளியாக உள்ளது.
