திரைப்பட விநியோகத்தில் வெற்றிக் கொடி நாட்டிய ஸ்கிரீன் சீன் மீடியா என்டர்டெயின்மெண்ட் பிரைவேட் லிமிடெட், ‘இருட்டு’, ‘தாராள பிரபு’, ‘எம்ஜிஆர் மகன்’ ஆகிய ஹிட் படங்களை தயாரித்ததன் மூலம் திரைப்படத் தயாரிப்பிலும் தடம் பதித்தது.
இந்நிறுவனத்தின் தயாரிப்பில் உருவாகியுள்ள ‘இடியட்’, ‘சாணி காயிதம்’ ஆகிய படங்கள் வெளியீட்டுக்கு தயராகி வருகின்றன.
இந்நிலையில், ஜெயம் ரவி நடிப்பில் மூன்று திரைப்படங்களை தயாரிக்கும் ஸ்கிரீன் சீன், அவற்றில் முதல் படத்தின் தலைப்பு மற்றும் முதல் பார்வையை இன்று வெளியிட்டுள்ளது. ‘அகிலன்’ என்று இப்படத்திற்கு பெயரிடப்பட்டுள்ளது.
பிரம்மாண்டமான பொருட்செலவில் தயாராகி வரும் இப்படத்தில் இதுவரை ஏற்றிராத ஒரு வேடத்தில் ஜெயம் ரவி நடிக்கிறார். பிரியா பவானி ஷங்கர் மற்றும் தன்யா ரவிச்சந்திரன் இருவரும் நாயகிகளாக நடிக்கின்றனர்.
சாம் சி.எஸ். இசை அமைக்கிறார். விவேக் ஒளிப்பதிவை கையாள, விஜய் முருகன் கலை இயக்கத்திற்கு பொறுப்பேற்றுள்ளார்.
ஜெயம் ரவி நடிப்பில் பூலோகம் திரைப்படத்தை இயக்கிய என். கல்யாண கிருஷ்ணன் இந்தப் படத்தை இயக்குகிறார்.
துறைமுகத்தை மையமாகக் கொண்ட இப்படத்தின் பெரும்பாலான காட்சிகள் தூத்துக்குடியிலும், சில முக்கிய காட்சிகள் சென்னை காசிமேட்டிலும் படமாக்கப்பட்டுள்ளன.
80 சதவீதத்திற்கும் அதிகமான காட்சிகள் படமாக்கப்பட்டுள்ள நிலையில் குஜராத்தில் உள்ள மிகப் பெரிய கண்டெய்னர் தளத்தில் நடைபெறவுள்ள படப்பிடிப்புடன் ஷீட்டிங் நிறைவடைகிறது.
முழுக்க துறைமுக பின்னணியில் உருவாகியுள்ள அகிலன், தமிழ் திரையுலகில் புதுமையாக முயற்சியாக இருக்கும் என்றும் ஜெயம் ரவியின் கதாபாத்திரமும், நடிப்பும் பெரிதும் பேசப்படும் என்றும் படக் குழுவினர் தெரிவிக்கின்றனர்.
‘அகிலன்’ படத்தின் ஃபர்ஸ்ட் லுக் போஸ்டர் இன்று வெளியிடப்பட்டுள்ளது. இந்த வருட கோடை காலத்தில் இத்திரைப்படம் வெளியாகிறது.
