நேற்று சென்னையில் நடைபெற்ற பத்திரிகையாளர்கள் சந்திப்பில் பேசிய கமல் ‘இந்தியன்-2’ படம் நிச்சயம் வரும் எனக் கூறியிருப்பது கமல் ரசிகர்களை உற்சாகப்படுத்தி உள்ளது.
இயக்குநர் லோகேஷ் கனகராஜ் இயக்கத்தில் கமல்ஹாசன், விஜய் சேதுபதி, பகத் ஃபாசில் மற்றும் சூர்யா நடிப்பில் உருவாகி உள்ளது ‘விக்ரம்’ திரைப்படம்.
இந்தப் படம் வரும் ஜூன் 3-ம் தேதியன்று உலகம் முழுவதும் வெளியாகவுள்ளது. இதையொட்டி படத்தின் பத்திரிகையாளர் சந்திப்பு நேற்று மாலை சென்னையில் ஹயாத் ஹோட்டலில் நடைபெற்றது.
இந்த சந்திப்பில் நடிகர் கமல்ஹாசன் பேசுகையில், “1986-ம் ஆண்டு வெளியான ‘விக்ரம்’ படத்தின் தொடர்ச்சியாக, அதன் 2-ம் பாகம் போலவே இந்த விக்ரம் படம் உருவாக்கப்பட்டுள்ளது. விரைவில் ‘விக்ரம்’ படத்தின் 3-ம் பாகமும் வெளியாகும் என்றும் கமல்ஹாசன் தெரிவித்தார்.
அதேபோல் “இந்தியன்-2’ படத்தை மீண்டும் தொடர்வதற்கான பேச்சு வார்த்தைகள் போய்க் கொண்டிருக்கிறது. விரைவில் ‘இந்தியன் 2’ படப்பிடிப்பும் தொடங்கும்” எனவும் கமல்ஹாசன் கூறினார்.
