“பரத்திடம் நிறைய முறை அடி வாங்கினேன்” – வாணி போஜன் புகார்..!

RP Films சார்பில் R.P.பாலா தயாரித்து இயக்கிருக்கும் படம் ‘லவ்’.

இந்தப் படத்தில் பரத், வாணி போஜன், விவேக் பிரசன்னா, ராதா ரவி, டேனியல் அன்னி போப் மற்றும் பலர் நடித்துள்ளனர்.

தயாரிப்பு நிறுவனம் – R.P.Films, தயாரிப்பு – R.P.பாலா – கௌசல்யா பாலா, இயக்கம் – R.P.பாலா, ஒளிப்பதிவு – P.G.முத்தையா, இசை – ரோனி ரபேல், படத் தொகுப்பு – அஜய் மனோஜ், கலை இயக்கம் – தினேஷ் மோகன் (MFA), நிர்வாகத் தயாரிப்பு – ஆண்டோ.எல், சண்டை காட்சி இயக்கம் – ஸ்டன்னர் சாம், நடனப் பயிற்சி இயக்கம் – சந்தோஷ், பத்திரிகை தொடர்பு – சதீஷ்(Aim).

மாறுபட்ட திரைக்கதையில் மிரட்டலான திரில்லராக உருவாகியுள்ள இப்படத்தின் டீசர் வெளியீட்டு விழா படக் குழுவினர் கலந்து கொள்ள பத்திரிக்கை, ஊடக நண்பர்கள் முன்னிலையில் நடந்தது.

இவ்விழாவினில் ஒளிப்பதிவாளர் P.G.முத்தையா பேசும்போது, “இது என் மனதிற்கு மிகவும் நெருக்கமான படம். படமெடுக்கும்போதே நிறைய சுவாரஸ்யங்கள் இருந்தது. இறுதிக் காட்சிகளில் வாணி போஜன் அட்டகாசமாக நடித்துள்ளார். அவரை விட்டு கண்ணை எடுக்க முடியவில்லை. பரத்தும் நானும் ஃப்ரண்ட்ஸ், இந்தப் படத்தில் அவர் நடிப்பில் பின்னியிருக்கிறார். படத்தை ரசிகர்கள் எப்படி எடுத்துக் கொள்ளப் போகிறார்கள் என்பதைக் காண ஆவலாக இருக்கிறேன்..” என்றார்.

நடிகர் டேனியல் பேசும்போது, “நான் காலேஜ் படிக்கும் போது எங்க ஏரியாவில் நடிகர் பரத்தை ஜிம்முக்குபோகும் போது பார்த்திருக்கிறேன். இப்போது அவரோடு நடித்தது மகிழ்ச்சி. நடிகை வாணியுடன் இன்னொரு படத்திலும் நடித்துக் கொண்டிருக்கிறேன். அவர் மிக நல்ல நடிகை. இந்தப் படம் மிக திரில்லிங்கான கதை. நிறைய டிவிஸ்ட் இருக்கிறது. இயக்குநர் R.P.பாலா சூப்பரான ஆக்டர். அவரை நடிகராக பார்க்க ஆசை. இந்தப் படம் என்னுடைய கேரியரில் முக்கியமான படமாக இருக்கும்..” என்றார்.

நடிகை வாணி போஜன் பேசும்போது, “பரத்துடன் இன்னொரு படத்தில் உடனே நடிக்க வேண்டுமா என்றுதான் முதலில் யோசித்தேன் ஆனால் இந்தக் கதை மிரள் படத்திலிருந்து மிகவும் மாறுபட்ட கதை. எனக்கு மிகவும் பிடித்திருந்தது. அதனால்தான் நடிக்க ஒத்துக் கொண்டேன்.

இந்தப் படத்தில் பரத்திடம் நிறைய அடி வாங்கினேன். நானும் நிறைய முறை திருப்பியடித்திருக்கிறேன். படத்தில் நிறைய ஆக்சன் காட்சிகள் இருக்கிறது. தினமும் வீட்டுக்குச் செல்லும்போகு காயங்களுடன்தான் சென்றேன். இது போல பல சுவாரஸ்யங்கள் படத்தில் இருக்கிறது. இந்தப் படம் எங்களுக்கு மிக நெருக்கமான படம். உங்கள் அனைவருக்கும் பிடிக்கும் என நம்புகிறேன்…” என்றார்.

நடிகர் பரத் பேசும்போது, “இந்தப் படக் குழு என் குடும்ப நண்பர்கள் மாதிரி பழகினார்கள். RP Films R.P.பாலா தயாரிப்பாளராக மாறிவிட்டார். அவர் மிகச் சிறந்த இயக்குநர். அவருடன் இந்தப் படத்தில் இணைந்ததில் எனக்குப் பெரும் மகிழ்ச்சி. என்னுடைய 50 வது படமாக இப்படம் அமைந்ததில் இன்னும் மகிழ்ச்சி. இதற்காக R.P.பாலா சாருக்கு நன்றி.

P.G.முத்தையா சார் ஒளிப்பதிவு மட்டுமல்லாமல் இப்படத்திற்கு மிகப் பெரிய முதுகெலும்பாக இருந்துள்ளார். அவருக்கு நன்றி. வாணி போஜனுடன் ‘மிரள்’ படத்தில் நடிக்கும் போது இந்தக் கதையைக் கேட்க சொன்னேன், அவருக்கும் கதை பிடித்துவிட்டது. உடனேயே நடிக்க ஒத்துக் கொண்டார். அவருக்கு எனக்கு இணையான பாத்திரம். நாங்கள் இருவரும் மிகச் சிறப்பாக போட்டி போட்டு நடித்துள்ளோம். டேனி இதில் வித்தியாசமாக நடித்துள்ளார். விவேக் மிகச் சிறந்த ஆக்டர்.

இந்தப் படத்தின் கதை முழுக்க ஒரு அபார்ட்மெண்டில் நடப்பது. அதற்கேற்ற பரபரப்பான திரைக்கதை படத்தில் இருக்கிறது. திரைக்கதையில் நிறைய திருப்பங்களும் இருக்கின்றன. இப்படம் உங்களை கண்டிப்பாகத் திருப்திப்படுத்தும்..” என்றார்.

படத்தின் இயக்குநரும், தயாரிப்பாளருமான R.P.பாலா பேசும்போது, “பரத்திடம் பல கதைகள் சொன்னேன். கடைசியில் இந்தக் கதைதான் அவருக்குப் பிடித்திருந்தது. P.G.முத்தையா சொல்லித்தான் இந்தப் படம் தயாரானது. அவர் என் நெருங்கிய நண்பர். என்னைவிட அவர்தான் இந்தப் படத்திற்காக அதிகம் உழைத்துள்ளார். விவேக்கை கண்டிப்பாக இப்படத்தில் கொண்டு வந்து விடுங்கள் என்று பரத் சொன்னார். விவேக்கும் சூப்பராக நடித்துள்ளார். டேனியல் என் நண்பர். பரத், வாணி போஜன்  இருவரும் பெரும் உழைப்பைத் தந்துள்ளார்கள். நான் அடுத்து எடுக்கும் படத்திலும் பரத் சார்தான் ஹீரோ. டிரெய்லர் வெளியிட்டு விழாவில் மீதத்தை சொல்கிறேன்..” என்றார்.