க்ரிஷ் இன்டர்நேஷனல் பிலிம் கிரியேஷன், சீட்ஸ் எண்ட்டெர்டெயின்மென்ட் மற்றும் சண்முகம் கிரியேசன் ஆகிய நிறுவனங்கள் இணைந்து தயாரிக்கும் புதிய படம் ‘சட்டம் என் கையில்’.
இந்தப் படத்தில் நகைச்சுவை நடிகரான சதீஷ் நாயகனாக நடிக்கிறார். நடிகர் பாவெல் நவகீதன் மற்றும் அஜய் ராஜ் இருவரும் முக்கிய கதாபாத்திரங்களில் நடித்துள்ளனர்.
ஒளிப்பதிவு – P.G. முத்தையா, இசை – M.S. ஜோன்ஸ் ரூபர்ட், படத் தொகுப்பு – கதிரேஷ் அழகேசன், கலை இயக்கம் – N.K. ராகுல், சண்டைப் பயிற்சி இயக்கம் – ராம்குமார், எக்ஸிகியூடிவ் புரொடுயுசர் – Pa. சிவா, மக்கள் தொடர்பு – சதீஷ் (AIM).
இப்படத்தை ‘சிக்சர்’ படத்தை இயக்கியிருந்த இயக்குநர் சாச்சி இயக்கியுள்ளார்.
இன்று இப்படத்தின் ஃபர்ஸ்ட் லுக்கை தமிழ் சினிமாவின் முன்னணி நடிகரான சிலம்பரசன் வெளியிட்டார்.
இந்தப் படம் குறித்து இயக்குநர் சாச்சி பேசும்போது, “காமெடி நடிகரான சதீஷை மாறுபட்ட தோற்றத்தில் காட்ட வேண்டும் என்று நினைத்தேன். சதீஷ் காமெடி மட்டுமே செய்யக் கூடியவர் அல்ல.. அவரின் திறமையை, அவரது வேறொரு பரிமாணத்தை ‘சட்டம் என் கையில்’ படத்தில் பார்க்கலாம். அவரது தனித்துவமான நடிப்பு நிச்சயம் அனைவரின் கவனத்தையும் ஈர்க்கும்.
என் முதல் படம் முழுக்க, முழுக்க காமெடியை சுற்றியதாக இருந்தது. ஆனால், இந்த படம் அதிலிருந்து மாறுபட்டு பரபர திரில்லர் படமாக உருவாகியுள்ளது.
ஒரு இரவில் நடக்கும் கதைதான். நாயகன் டிரங்க் & டிரைவ் கேஸில் போலீசிடம் மாட்டுகிறார், அந்த இரவில் அவருக்கு நடக்கும் சம்பவங்கள்தான் இந்தப் படம். மென்மையாக ஆரம்பிக்கும் படம், ரசிகர்களை இருக்கை நுனியில் அமர்த்தி வைக்கும் பரபர திரில்லர் அனுபவமாக மாறிவிடும். அனைத்து மக்களையும் எளிதில் கவரும் படியாக, கமர்ஷியல் திரில்லராக இப்படம் இருக்கும்.
இப்படத்தின் ஃபர்ஸ்ட் லுக்கை ஒரு பிரபலம் வெளியிட்டால் நன்றாக இருக்குமென நடிகர் சிலம்பரசன் TR அவர்களை அணுகினோம். உடனே ஒப்புக் கொண்டு, படத்தை பாராட்டி ஃபர்ஸ்ட் லுக்கை வெளியிட்டார். அவருக்கு இந்த நேரத்தில் எங்களது படக் குழுவினர் சார்பாக நன்றியை தெரிவித்து கொள்கிறேன்…” என்றார்.
